A thôn Dor, cheăm Glar, tơring Đăk Đoa, tíu kot mâ dêi 256 rơpŏng mơngế Bơhnéa, tơdroăng ki phiu ro dêi hâi Têt Tơniăn krê phiu ro khât, ƀă mơngiơk mâu hlá cơ khêi hơlŏng trĭng.

Drêng kố, vâi krâ nhŏng o tung thôn ối tơkŭm po mâu tơdroăng ki tơ’noăng ivá vâ koh tơdah hâi leh. Pôa Sing, ngế pơkuâ thôn Dor, cheăm Glar, tơring Đăk Đoa tối:

“Drêng leh lơ 2/9, rơpŏng á ƀă tá kuăn pơlê tung pơlê kơtúa hlá cơ Tơnêi têa, tơkŭm po ôu kâ hâi mơjiâng Tơnêi têa. Ƀă klêi mê chơ dêi rơpó troh a Plông kơtú ƀa long dêi tơring Đăk Đoa vâ ngăn rôh tơ’noăng kơtú ƀâ long xua tơring tơkŭm po. Tối tơdjuôm, tơdroăng rêh ối dêi vâi krâ nhŏng o ngin xuân hiăng chía niân tâ tâng pơchông ƀă hdrối nah. Mê rôh leh kố hên rơpŏng xuân tơkŭm po mâu tơdroăng ăm dêi kuăn lăm xah hêi, pro tơdroăng ki hơniâp ro, hâk vâ hriâm tâp ăm mâu vâi muăn klêi kơ’nâi mâu hâi leh pơtê”.

*** Pôa Y Sênh, kuăn ngo M’Nông, 83 hơnăm, cho ngế ki kuăn pơlê pâ nhoăm a ƀon R’but, cheăm Quảng Sơn, tơring Dak Glong, kong pơlê Dak Nông. Drêng troh hâi mơjiâng Tơnêi têa, pôa Y Sênh tơmiât pâ troh mâu khế hơnăm tơplâ khên tơnôu nah. Pơtối mê, hơnăm 1961, pôa Y Sênh veăng pro yu kit, troh hơnăm 1964 mê lăm pro mố đô̆i, veăng tơplâ troh drêng tơnêi têa châ tơleăng lĕm 1975  nếo vêh pơlê xiâm veăng pêi tơdroăng cheăng ƀă mâu kăn a kong pơlê. Tiah mê, pôa hlê nhên ki pơxúa dêi tơdroăng hơniâp lĕm, tơniăn lĕm.

“Klêi tơnêi têa châ tơleăng lĕm kuăn pơlê nếo hmiân tuăn pêi cheăng kâ. Xuân kơnôm châ Đảng, tơnêi têa, mâu kăn cheăm, tơring, kong pơlê tơmâng hnê ngăn, kum kuăn pơlê mơnhông tung rêh ối, pêi cheăng. Kuăn pơlê loi kơ troăng rơhlâ dêi Đảng, luât Tơnêi têa, kơhnâ pêi cheăng kâ mê nôkố tơdroăng rêh ối kuăn pơlê hiăng tơ-ƀrê tâ hdrối.