Cheăm tơkăng kong Ia Nan, tơring Đức Cơ, kong pơlê Gia Lai, ai lối 8.000 pơ’leăng mâ mơngế, ki hên cho mơngế hdroâng kuăn ngo rêh ối. Ƀă kơpong kân rơdâ, kuăn pơlê rêh ối tơprâ tơprŭng, hên kuăn pơlê xuân ối pro xêh hnêa vâ tơnăng kuăn kiâ kong. Trung tă Đỗ Giang Nam – Kăn pơkuâ Kŏng an cheăm Ia Nan, tơring Đức Cơ tối ăm ‘nâi:

‘’Cheăm Ia Nan ai 3 ngế pơlê kuăn pơlê hdroâng kuăn ngo, ki hên kuăn pơlê pêi chiâk deăng. Ai tâng tối kuăn pơlê ai kơtôa pháu  hnêa, tơmeăm ki pơtôu tung chiâk deăng ôh tá djâ vêh a tíu kuăn pơlê rêh ối, hngêi ối. Khu kŏng an cheăm hiăng lăm tơrŭm ƀă khu Mô đô̆i gâk tơkăng kong, khu pơkuâ tơdroăng cheăng mô đô̆i tung cheăm pơtâng tối, mơhnhôk hnê pơchân tối mâu vâi rơtăm a thôn, pơlê hmâ xúa hnêa ki pro xêh lăm tơnăng kuăn kiâ kong’’.

Mâu kăn ƀô̆ kŏng an xuân tơrŭm ƀă krâ pơlê, ngế ki kuăn pơlê loi tơngah vâ mơhnhôk mâu ngế krê dế xúa hnêa ki pro xêh, tơmeăm pơtôu pơcháu nâp ăm khu cheăng. Môi tiah pôa Rơ Châm Míu, ngế ki kuăn pơlê loi tơngah dêi pơlê Nú, cheăm Ia Nan đi đo pêi pro mâu roh hôp vâ pơchân tối kuăn pơlê pêi lĕm tro tiô luât, rêh ối lĕm, đi đo pâ dêi pó, tŏng kum dêi pó tung pêi cheăng pêt mơjiâng tơmeăm, ôh tá ‘măn kơtôa hnêa ki pro xêh

‘’Xúa hnêa mê pơla kố nah á xuân pơtâng tối hên ngế, thế nâp ăm cheăm, xua drêng ôu drôu pôu, hêng hôu mê xo hnêa pĕng gá tiah lâi ah xua mê khu kŏng an ƀă mô đô̆i gâk tơkăng kong xuân pơtâng tối vâ kuăn pơlê ôh tá xúa hnêa xua gá kô pro tơdjâk ‘mêi troh châ chăn ƀă rơpŏng’’.

Thiê̆u tă Nguyễn Thành Duy – Kăn phŏ Kŏng an cheăm Ia Dom, tơring Đức Cơ tối ăm ‘nâi, rơtế ƀă tơdroăng mơdêk pơtâng tối mơhnhôk, mâu khu cheăng tung tíu tơkăng kong thế ‘nâi tơdroăng a pơlê cheăm, mơnhông hnoăng dêi kuăn pơlê tung tơniăn gâk kring:

‘’Kŏng an cheăm rơtế khu cheăng veăng mot mơhnhôk, pơtâng tối kuăn pơlê a mâu thôn, pơlê nâp tơmeăm pro hngêi, pháu hnêa, tơmeăm pơtôu. Ai mâu tơdroăng ki pá puât cho mâu rơtăm rôe mâu kế ki pro hnêa dêi mâu ngế ki tê tung măng pơlê pơla vâ krâ pro hnêa. Kŏng an cheăm xo tơvêh châ 2 tơmeăm ki pro hnêa ƀă pơcháu ăm Kŏng an tơring tơleăng tiô pơkâ’’.

Sap apoăng hơnăm troh nôkố, kuăn pơlê hiăng nâp ăm Kŏng an tơring Đức Cơ tâi tâng vâ chê 70 toăng hngêi ƀă tơmeăm kum pro hnêa, rơtế mâu kế tơmeăm pơtôu, tơmeăm ki vâ krâ pro hnêa.