Hên  mâu kăn vâ môi tuăn ƀă tơdroăng tối tơbleăng dêi Chin phuh ‘na tơdroăng hiăng pêi pro dêi hơnăm 2023 ƀă mâu pơkâ mơnhông cheăng kâ - rêh ối mâu hơnăm la ngiâ; tối nhên tung tơdroăng xơpá tơdjuôm dêi tơdroăng cheăng kâ lâp plâi tơnêi, la Chin phuh hiăng ai mâu tơdroăng hnê mơhno nhên kơtăng ƀă tơƀrê châ môi tiah tơdroăng púi vâ mơhnhôk.

Khĕn kơdeăn hnoăng cheăng hiăng châ pêi pro, hên mâu kăn tối vâ ai tiah tơdroăng pơkâ mơdêk tơƀrê tung la ngiâ, Chin phuh, mâu khu xiâm kơvâ cheăng kal pêi tơƀrê tung tơdroăng xo liăn ngân ‘no mơjiâng tơmeăm khoăng tơnêi têa, ‘mâi hơ’lêh tơdroăng tê mơdró ƀă kơjo kum ăm mâu khu mơdró ‘mâi mơnhông klêi kơ’nâi COVID-19.

Hên mâu kăn xuân pơkâ thế tơmâng khât tâ nếo mâu tơdroăng rêh ối, hbrâ mơdât mâu ki ai xôi, malối mâu ai xôi ki nếo. A hneăng hôp tơpui tơno, mâu kăn pơkâ thế tối nhên tíu ki lâi tối ai 350 rơpâu rơtal liăn vâ pêi pro mơhno túa lĕm tro; hlối thế tối nhên ki xiâm ƀă túa pêi pro, tơdroăng pơkâ pêi dêi tơdroăng mê, ing mê, nếo mơnhên xiâm liăn ngân  vâ tơtro.