VOV4.Xơ Đăng - Pơtối tơdroăng rôh hôp má 3, Kuô̆k hô̆i hneăng 15, kơxo lơ 26/5, Kuô̆k hô̆i tơpui tơno a hngêi hôp ‘na mâu tơdroăng ối hên ngế tối pơrá phá dêi tơdroăng tơkêa luât Kăn sát cơ đŏng. A rôh tơpui, mâu kăn Kuô̆k hô̆i hiăng mơhno ki vâ môi tuăn hên ƀă tơdroăng tơbleăng tối nhên, tơmâng  xo,  ‘mâi rơnêu tơdroăng chêh ‘na Luât kăn sát cơ đŏng.

Vâ pơtối chêh klêi hlá mơ-éa luât, mâu kăn Kuô̆k hô̆i hiăng tơkŭm veăng hnê tối mâu luât pơkâ tŏng kum ki kân, pơkâ ‘na hnoăng cheăng pêi, tơdroăng pêi cheăng, hnoăng ki chiâng phêp pêi, vâ mơjiâng khu kăn sát cơ đŏng rơkê khât, ƀĕng ƀeăn tiô túa nếo nôkố. Vâ mâu kăn sát cơ đŏng pê klêi hnoăng cheăng tơná “tơdroăng cheăng ki xiâm”, mâu kăn Kuô̆k hô̆i xuân veăng hnê tối ‘na hnoăng cheăng pơkuâ, tơrŭm ƀă mâu khu ki ê tung mâu tơdroăng cheăng pêi mê cho: rak tơniăn ‘na kring vế, gak tơniăn kring gak kơpong tíu tơkăng kong, pơkuâ tơdroăng tŏng kum, tŏng xo mâu ngế trâm xía vâ a têa kơxĭ.