Pôa Bùi Văn Cường , Ngế xiâm chêh tôm xo rơkong Kuô̆k hô̆i, Ngế pơkuâ Ƀơrô Kuô̆k hô̆i tối tơbleăng tơdroăng cheăng hbrâ pêi pro. Ing mê, Kuô̆k hô̆i kô hbrâ 2,5 hâi vâ kơ-êng ƀă tiâ tơdroăng kơ-êng. Kuô̆k hô̆i kô séa ngăn tơdroăng pêi pro dêi mâu kơ koan ƀă 10 tơdroăng pơkâ tung hneăng má 14 ƀă hneăng 15 ‘na séa ngăn tơdroăng tơpui ki xiâm ƀă hnối kơ-êng mơnhên.

Tối tơbleăng a rôh pêi cheăng, pôa Phạm Minh Chính, Ngế pro xiâm hnê ngăn Chin phuh khĕn kơdeăn tơdroăng cheăng hbrâ tơkŭm po mâu rôh kơ-êng ƀă tiâ tơdroăng kơ-êng a Rôh hôp má 6, Kuô̆k hô̆i hneăng 15. Klêi tơpui tơno a rôh pêi cheăng mê kum tăng troăng rơhlâ kơ-êng ki tơƀrê má môi, ing mê, veăng mơdêk ivá cheăng tơƀrê pơxúa tơdroăng cheăng pêi ƀă ki loi nhoăm dêi Kuô̆k hô̆i.

Pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, ‘na tơdroăng tơkŭm po kơ-êng ƀă tiâ tơdroăng kơ-êng tiô 4 khu tơdroăng: Cheăng kâ hên tơdroăng - cheăng kâ kân - cheăng  tiô kơvâ pêi; ‘na túa lĕm tro, rêh ối; ‘na luât, tơdroăng cheăng pro mâu túa hlá mơ-éa, riân ngăn liăn Tơnêi têa. Chôu phut kơ-êng tiâ pơkâ ăm rêm khu tơdroăng cheăng sap 160 troh 170 phut, la drêng kơ êng tiâ kô tơpui rĕng  kơ-êng tiâ tiô tơdroăng kal tơdroăng ki hlo ai khât.