VOV4.Xơ Đăng - Hâi lơ 6/6, Hneăng hôp má 3, Kuô̆k hô̆i hneăng má 15 mot măng tĭng pêi cheăng má pái. Môi tung mâu tơdroăng xiâm ki kal châ mâu kăn teăng mâ tơpui tơno a tôh kơxo kố cho Troăng hơlâ mơ’no liăn pro troăng pakĭng 3 Pơlê kong kân Hồ Chí Minh ƀă troăng pakĭng 4 kơpong pơlê kong xiâm Hà Nội.

Hên ngế rơkê xuân tối nhên, Hà Nội ƀă Pơlê kong kân Hồ Chí Minh cho ‘’tíu’’ trâm mâ, cho tíu troh dêi mâu khu mơ’no liăn cheăng ƀă tơmối ôm hyô lâp plâi tơnêi. Tơdroăng mơ’no liăn pro troăng kân pakĭng 3 ƀă 4, tơniăn ăm hngêi trăng, troăng klông troh a dêi pó xuân kum kal khât thăm mơnhông, mơđah tơbleăng, mơhnhôk mơ’no liăn cheăng ƀă ôm hyô lâp plâi tơnêi troh Việt Nam.

Tiô tơdroăng hneăng hôp, tung măng tĭng kố, Kuô̆k hô̆i xuân tơpui tơno ‘na tơdroăng Pơkâ ‘na mơnúa mâu troăng pơkâ pêi, troăng hơlâ phá tơ-ê mơnhông mơdêk kong pơlê Khánh Hòa; tơpui tơno ‘na pơtroh kơxô̆ liăn mung ‘na ăm mung liăn, pôu râng hnoăng cheăng Chinh phuh chiâng xing xoăng liăn ngân tơnêi têa.

Ki rơhêng vâ tối, Kuô̆k hô̆i mơdoh 2 hâi tơdế vâ tơmâng kơ-êng ƀă tiâ rơkong kơ-êng ‘na mâu khu tơdroăng ối tung kơvâ pêi chiâk deăng ƀă mơnhông mơdêk thôn pơlê, kơvâ liăn ngân, kơvâ hngêi arak liăn ƀă kơvâ troăng klông.

A Sa Ly tơplôu ƀă tơbleăng