VOV4.Xơ Đăng - Kơxê lơ 7/6, Kuô̆k hô̆i pơxiâm hôp kơ-êng ki apoăng tung pơla 2 hâi tơdếtơdroăng kơ-êng ƀă tiâ tơdroăng ki kơ-êng. Pôa Lê Minh Hoan, Ngế xiâm ngăn ‘na chiâk deăng ƀă mơnhông thôn pơlê cho ngế ki apoăng tiâ rơkong kơ-êng a ngiâ Kuô̆k hô̆i.

Tơbleăng hâi pơxiâm po Kơ êng ƀă tiâ mâu tơdroăng kơ êng, pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, tơdroăng kơ-êng a rôh hôp mê châ tơkŭm po tiô tơdroăng xo mâu khu tơdroăng mê xiâm, ‘na hnoăng cheăng pêi dêi rêm ngế, mơngế ki ai hnoăng pêi dêi tơdroăng cheăng  tiâ kơ êng. 4 khu tơdroăng kơ-êng xuân cho tung tơdroăng rak ngăn tơnêi têa dêi mâu Khu xiâm: Khu xiâm ngăn ‘na liăn, ‘na pêi chiâk deăng ƀă mơnhông thôn pơlê, ‘na troăng prôk rơxế kơtâu, Hngêi rak liăn ngăn tơnêi têa Việt Nam a rôh hôp mê.

Tơdroăng pêi chiâk, tơdroăng Kuô̆k hô̆i vâ ’nâi mâu tơdroăng kơ-êng “Châ tơmeăm la liăn ôh tá kơnâ” ƀă mâu tơdroăng tơleăng mơnhên mâu tơmeăm pê ki hâi kâi mơgêi; ‘na yă phon rơvât, pơkeăng xôh kơdê ôa hdrong, mơnăn mơnôa, mơdrăn chĕm mơnăn, mâu tơmeăm xúa tung pêi cheăng kâ ki tâk kơnâ.

Tiâ mâu kăn Kuô̆k hô̆i, troăng rơhlâ pêi pro, mê pôa Lê Minh Hoan tối nhên, mê cho tơdroăng tơkŭm pêi pro, mơhnhôk kuăn pơlê pêi cheăng tơrŭm. Pakĭng mê tối nhên troh tơdroăng tơmiât ing pêi chiâk, troh tơdroăng tơmiât ing pêi chiâk deăng bu i kâ chiâng mơdró tơmeăm ing chiâk deăng.

Ing tơdroăng ki séa ngăn rôh pơchuât dêi pôa Lê Minh Hoan, ngế xiâm ngăn chiâk deăng ƀă mơnhông thôn pơlê, pôa Nay Hứ (66 hơnăm, a Tây Sơn, pơlê kong kơdrâm Plei Ku, kong pơlê Gia Lai tơmâng ngăn khât troh mâu troăng hơlâ ngế xiâm ngăn chiâk deăng mơ’no tối ƀă tơdroăng yă tê mâu pơkeăng xôh kơdê oâ hdrong xúa tung pêi chiâk deăng to kơnâ môi tiah nôkố.

Pôa Nay Hứ rơhêng vâ, klêi kơ’nâi hneăng hôp, Ngế xiâm ngăn chiâk deăng ƀă mơnhông thôn pơlê ai túa pơkâ ki nhên tơtro ƀă mâu kong pơlê, kơpong tung pơkâ tơleăng mâu tơdroăng ki tơvâ tơvân tung mơnhông mơdêk pêi chiâk deăng:

“Rơhêng vâ klêi kơ’nâi hneăng hôp, Ngế xiâm ngăn 'na chiâk deăng ai túa pơkâ hnê mơhno nhên tơrêm kơpong, hnê mơhno tơtro. Pơtih a Tây Nguyên, ki hên cho pêi chiâk deăng, pro tiah lâi vâ hnê mơhno troăng prôk ơêi chiâk deăng dêi Tây Nguyên tro troăng, hlo tơƀrê tâ”.

Hâi kố, Ngế xiâm ngăn 'na chiâk deăng ƀă Mơnhông thôn pơlê cho pôa Lê Minh Hoan pơtối pơtroh rơkong tiâ mơnhên a ngiâ Kuô̆k hô̆i. Pơtối mê cho rôh kơ-êng ƀă tiâ mơnhên dêi pôa Hồ Đức Phớc, ngế xiâm rak liăn ngân ƀă kăn pơkuâ Hngêi rak liăn Tơnêi têa Việt Nam Nguyễn Thị Hồng.

Gương tơplôu ƀă tơbleăng