VOV4. Xơ Đăng - Kơxo lơ 9/6 xua tơdroăng ki pơkuâ dêi pôa Vương Đình Huệ, kăn xiâm hnê ngăn Kuô̆k hô̆i, pôa Hồ Đức Phớc, ngế xiâm rak liăn ngân tơnei têa hiăng pơchuât tơdroăng ki tiâ mơnhên dêi kăn Kuô̆k hô̆i. Mâu tơdroăng ki châ mâu kăn tơmâng ngăn kơ-êng cho tơdroăng ki ôh tá tơniăn tung pơkâ yă; mâu tơdroăng ki ôh tá tro tung kơxô̆ liăn tơlo hơ’lêh; tơdroăng ki pêi pro phá tơ-ê ƀă luât pơkâ, ôh tá nâp hnoăng liăn mơhá ƀă rơxế ki châ hbru ăm, kơchơ tê mơdró chứng khoán ƀă phĭu liăn; tơdroăng ki pro tơniăn yă mơ-éa hriâm ăm hok tro ƀă hên ki ê.

Troăng hơlâ châ ngế xiâm liăn ngân tơnêi têa tối tung tơdroăng rak ngăn pơkâ yă; kơchơ mơdró chứng khóan ƀă phĭu liăn cho mơdêk séa ngăn; pơkâ tơleăng xơpá ăm tơdroăng tơlo liăn hơ’lêh tro pơkâ. ‘Na yă tê hlá mơ-éa hriâm, Ngế xiâm ngăn liăn ngân cho pôa Hồ Đức Phớc tối ‘na pơkâ tơbleăng yă ƀă tối troăng hơlâ pơkâ ăm hlá mơ-éa hriâm mot tung tơdroăng pơkâ yă ƀă mâu kơpong hngế hngo, mâu ngế kơtiê châ tŏng kum ƀă hên ki ê.

Katarina Nga tơplôu ƀă tơbleăng