Hdrối mê, a rôh hôp kơxê lơ 24/10, pơkuâ tơdroăng túa pơkâ xo phĭu pôk, pôa Vương Đình Huệ, Kăn xiâm hnê ngăn Kuô̆k hô̆i tối nhên: Tơdroăng ki xo phĭu cho vâ mơdêk ki xêt khât, ki tơƀrê tơdroăng séa ngăn dêi Kuô̆k hô̆i, mơdêk ki rơkê, tơƀrê dêi tơdroăng cheăng dêi khu xiâm pơkuâ kơ koan Tơnêi têa, veăng kum mơnhên tối tơdroăng ki châ vâi loi tơngah ƀă klêi kơ’nâi pêi pro hnoăng cheăng, hâi khế pơkuâ châ pơcháu dêi ngế ki xo phĭu pôk kum ăm mâu inâi châ Kuô̆k hô̆i pôk.

Klêi mê, kĭ hlo kơlo ki pôk dêi tơná vâ pơtối mơ-eăm hriâm pât, mơdêk ki rơkê ƀă tơƀrê dêi hnoăng cheăng, tơdrêng amê hlối cho tíu ki vâ mâu kơ koan, khu tơrŭm ai hnoăng pơkuâ séa ngăn pơkâ hnê, hnê tơ’nôm, xing xoăng ƀă xúa kăn ƀô̆.