Tung kơxo kố, mâu kăn Kuô̆k hô̆i tơpui a hngêi hôp kân ‘na tơdroăng hiăng klêi séa ngăn tơdroăng săm phoăng dêi kuăn pơlê  pơtroh ăm rôh hôp má 5, Kuô̆k hô̆i hneăng 15. Tối tơbleăng séa ngăn tơdroăng tơleăng mơnhên pâ thế dêi kuăn pơlê pơtroh ăm rôh hôp má 5, Kuô̆k hô̆i  hneăng 15, Ngế hnê mơhnhôk cheăng dêi Vi ƀan Pơkuâ cheăng Kuô̆k hô̆i Dương Thanh Bình ăm ‘nâi, troh nôkố, 2 rơpâu 751 tơdroăng veăng hnê tối hiăng châ tơleăng mơnhên, tiâ rơkong kuăn pơlê, châ 99%.

Kuăn pơlê khĕn kơdeăn khât tung pơla hdrối mê hía nah, tơdroăng cheăng dêi Kuô̆k hô̆i hiăng ai hên ki pơ’lêh nếo, tơƀrê, pơxúa, mơhno ăm hlo Kuô̆k hô̆i rế hmâ khât ƀă kuăn pơlê. Pơkâ thế ƀă Kuô̆k hô̆i cho pơtối mơdêk tâ nếo ki tơƀrê tung pêi cheăng séa ngăn pơkâ hlá mơ-eá luât; mâu Khu kăn Kuô̆k hô̆i mơdêk ki tơƀrê tơkŭm, klâ túa, tơleăng mơnhên tơdroăng ki kuăn pơlê tối.