Pơtối hôp rôh má 6, hâi kố lơ 30/10, Kuô̆k hô̆i pơxiâm mot tung măng tĭng pêi cheăng ki má 2. Tung hâi kố, mâu kăn Kuô̆k hô̆i  tơpui a hngêi hôp kân ‘na tơdroăng tơbleăng pêi mâu pơkâ dêi Kuô̆k hô̆i ‘na mâu tơdroăng pơkâ dêi tơnêi têa tung mơjiâng thôn pơlê nếo pơla hơnăm 2021- 2025, xăm kơtiê krá tơniăn ton pơla hơnăm 2021-2025, mơnhông cheăng kâ rêh ối kơpong kuăn ngo ƀă kong ngo pơla hơnăm 2021-2030. Troh  mơ’nui khế 8 hơnăm kố, tâi râng kơxô̆ liăn ‘no mơjiâng tơmeăm khoăng tơnêi têa liăn ngân dêi 3 tơdroăng pơkâ dêi tơnêi têa ai 16 rơpâu 300 rơtal liăn, nếo châ 4% tiô pơkâ. 

Liăn xoăng hâi tơxâng ƀă tơdroăng pơkâ, liăn xoăng ‘no mơnhông mơdêk liăn ngân xiâm tơnêi têa hrá (pái khế sap khế pŭn troh khế tơdrốu hơnăm 2022 nếo pơcháu); kơxô̆ liăn ăm kong pơlê  pêi cheăng hâi tơtro. Xăm kơtiê hâi ai tiô pơkâ hên troăng hâi krá tơniăn, malối a kơpong hdroâng kuăn ngo, kong ngo.

Pôa Trần Lưu Quang - Ngế pro xiâm hnê ngăn Chin phuh ăm ‘nâi: Chin phuh pơkâ thế Kuô̆k hô̆i pơtroh kơxô̆ liăn dêi hơnăm 2023 ăm hơnăm 2024 ƀă pơkâ thế mâu kong pơlê oh tá xê to xo liăn ngân mê tơmeăm khoăng mơjiâng pro thế krá tơniăn.