VOV4.Xơ Đăng - Kơxo lơ 6/6, Hneăng hôp má 3, Kuô̆k hô̆i hneăng má 15 tơpui tơno a tôh ‘na Troăng hơlâ mơ’no liăn cheăng 3 tơdroăng tơkêa bro mơjiâng troăng kân ăm phêp rơxế kơtâu têi Châu Đốc – Cần Thơ – Sóc Trăng (hneăng má 1); Khánh Hòa – Buôn Ma Thuột (hneăng má 1); Biên Hòa – Vũng Tàu (hneăng má 1) ƀă troăng hơlâ mơ’no liăn pro troăng kân pakĭng 4 kơpong pơlê kong xiâm Hà Nội ƀă tơdroăng tơkêa bro troăng kân pakĭng 3, Pơlê kong kân Hồ Chí Minh.

Hên mâu kăn tối môi tuăn ƀă troăng hơlâ mơ’no liăn 5 tơdroăng tơkêa bro troăng klông vâ mơnhông mơdêk cheăng kâ – rêh ối pơlê pơla, mơjiâng troăng klông tơdâng tơ’mô, tah lôi chôm drô troăng kân drêng pơto tơmeăm, kơdroh tơklâm rơxế. Laga mâu kăn teăng mâ xuân veăng tơpui, pâ thế Chin phuh mơnhên mâu tơdroăng xiâm tung troăng hơlâ mơ’no liăn cheăng xuân môi tiah mâu troăng pêi pro tơdroăng tơkêa bro.

Ƀă 3 tơdroăng tơkêa bro troăng kân Châu Đốc – Cần Thơ – Sóc Trăng; Khánh Hòa – Buôn Ma Thuột; Biên Hòa – Vũng Tàu mâu kăn teăng mâ tối tô tuăn xua tơdjâk hên troh ƀăng tơnêi kong, tung mê krê tơdroăng tơkêa bro Khánh Hòa – Buôn Ma Thuột kal pơ’lêh ƀăng kong tâk troh 219 rơpâu ha.

A Sa Ly tơplôu ƀă tơbleăng