VOV4.Xơ Đăng - Hâi lơ 25/5, hneăng hôp má 3, Kuô̆k hô̆i hneăng má 15 pơtối tơdroăng ki hôp ƀă hên tơdroăng ki kal. A kơxo, Kuô̆k hô̆i tơpui tơno a tôh ‘na Mơnhên tối ‘mot tơ’nôm klêi kơ’nâi pêi pro túa pơkâ mơnhông mơdêk cheăng kâ rêh ối pơlê pơla ƀă liăn ngân tơnêi têa hơnăm 2021; tơdroăng pêi pro túa pơkâ mơnhông cheăng kâ rêh ối pơlê pơla ƀă liăn ngân tơnêi têa mâu khế apoăng hơnăm 2022; Kĭ pơkâ, mơgêi ‘no hrê liăn ngân tơnêi têa hơnăm 2020; Hnoăng cheăng pêi pro kơdĭng, hbrâ mơdât mơhrê liăn ngân tê kơtê hơnăm 2021.Tơdroăng ki mơgêi pêi pro Pơkâ kơxô̆ 42 dêi Kuô̆k hô̆i ‘na pơkâ tơdroăng ki pơxâu phâk tơdroăng ki chĕn liăn ôh tá ‘nâi mơdrếo dêi mâu khu tơrŭm ăm mung ƀă tơdroăng ki pro mơdon hâi khế xúa tâi tâng pơkâ dêi tơdroăng Pơkâ kơxô̆ 42.

Kơxê, Kuô̆k hô̆i tơmâng hlá mơ-éa tối tơbleăng tơdroăng tơkêa Luât Khăm pơlât, ‘mâi hơ’lêh ƀă Tơpui tơno a hngêi hôp kân ‘na mâu tơdroăng kal ki ối ai rơkong tơpui tối ki phá tơ-ê dêi pó dêi kơxop hlá mơéa Luât đŏng pro xinê ki ‘mâi hơ’lêh.

Katarina Nga tơplôu ƀă tơbleăng