VOV4.Xơ Đăng - Hâi lơ 10/6, Kuô̆k hô̆i pơxiâm tơpui tơno ‘na Troăng hơlâ pơkâ thế mơ’no liăn ngân vâ mơjiâng 5 tơdroăng tơkêa bro, mê cho: troăng Ví kơxô̆ 4 pơlê kong xiâm Hà Nội; troăng Ví kơxô̆ 3 Pơlê kong kân Hồ Chí Minh; tơdroăng tơkêa bro mơjiâng pro troăng rơxế kơtâu ki kân, tơdrăng xŏn kơtâu sap ing Châu Đốc troh a Cần Thơ troh a Sóc Trăng; troăng kơtâu ing Khánh Hoà troh a pơlê kong kơdrâm Ƀuôn Ma Thuột; troăng kơtâu sap ing Biên Hoà troh a Vũng Tàu. Kố cho mâu tơdroăng tơkêa bro ki nhên, pêi pro tiô tơdroăng pơkâ dêi Hneăng hôp kân 13 dêi Đảng ƀă tơdroăng pơkâ kơxô̆ 31 dêi Kuô̆k hô̆i ‘na tơdroăng ki ‘mâi mơnhông pêi cheăng kâ tung plâ 20 hơnăm la ngiâ, mơjiâng pro troăng prôk ƀă pơtối po rơdâ tơrŭm tơdjêp pơla rêm kơpong.

Kơxê mê, hneăng hôp má 3, Kuô̆k hô̆i hneăng 15 hiăng pêi pro klêi roh ki êng-tiâ châ po tung pơla 2 hâi tơdế. Pôa Phạm Bình Minh, Ngế pro xiâm phŏ hnê ngăn má môi hiăng tiâ mơnhên tâi tâng mâu tơdroăng ki ai todjâk troh ƀă hnối tiâ mơnhên mâu kăn Kuô̆k hô̆i ai êng. Mâu kăn hiăng tối mơnhên rơkong êng tiâ mê hiăng ai ki hơ’lêh nếo, hneăng kố ôh tá ai Ngế xiâm tối tơbleăng hnoăng cheăng ki rơkê dêi tơná, xua mê, ai hên chôu phut vâ mâu kăn êng mơnhên mâu tơdroăng ki ai tơdjâk. Mâu tơdroăng ki Kuô̆k hô̆i rah xo vâ êng roh kố pơrá ai ing tơdroăng ki păng ‘nâng, mơhno tối hiâm mơno pói vâ, rơkong tơpui tối dêi kuăn pơlê. Tiâ mơnhên mâu Ngế xiâm ngăn ‘na tơdroăng cheăng, hlo nhên, tŭm tơdroăng tiâ mơnhên mê hiăng tơdrăng khât, tối tro tơdroăng ki xiâm, hiăng lăp kơ tuăn mâu tơdroăng ki xua khu kăn Kuô̆k hô̆i hiăng êng.

Nhat Lisa tơplôu ƀă tơbleăng