VOV4.Xơ Đăng - Tung 2 hâi, lơ 1/6 ƀă kơxo lơ 2/6, Kuô̆k hô̆i tơpui tơno a hngêi hôp kân ‘na mơnhên tơ’nôm tơdroăng châ tơƀrê pêi pro pơkâ mơnhông mơdêk cheăng kâ – rêh ối pơlê pơla ƀă liăn ngân tơnêi têa hơnăm 2021; tơdroăng pêi pro pơkâ pêi mơnhông cheăng kâ – rêh ối pơlê pơla ƀă liăn ngân tơnêi têa mâu khế apoăng hơnăm 2022; Mơgêi tơdroăng pêi pro Pơkâ kơxô̆ 42 dêi Kuô̆k hô̆i ‘na mơnúa tơleăng tơdroăng chĕn liăn ôh tá kâi chêl dêi mâu khu ăm mung liăn.

A roh pơxiâm po Hneăng hôp Kuô̆k hô̆i, pôa Lê Văn Thành, Ngế pro xiâm phŏ hnê ngăn tơnêi têa tơbleăng mơnhên: Chin phuh pơkâ 12 khu hnoăng cheăng troăng pêi, tung mê tơtrŏng tơkŭm mơdât pơreăng COVID-19 ƀă rak tơniăn rĕng, mơnhông mơdêk cheăng kâ – rêh ối pơlê pơla krá tơniăn. Pêi pro mâu pơkâ dêi Hneăng hôp Tơnêi têa 5 (hneăng 13), ki má lối cho tơdroăng ‘na tơnêi tơníu, cheăng kâ khu pú hên, pêi chiâk deăng, kuăn pơlê pêi chiâk deăng ƀă kơpong rêh ối pêi chiâk deăng; thâ pêi kêi đeăng, tơbleăng Kuô̆k hô̆i ‘mâi rơnêu Luât tơnêi tơníu hơnăm 2013.

Chin phuh xuân mơnhên pêi pro kơtăng mâu troăng thăm mơ’no liăn ăm mung ƀă mơ’no liăn cheăng tơnêi têa; Tơdrêng amê thăm mơdêk ivá pêi cheăng dêi ƀok thái pơkeăng. Tơkŭm po tơtro hneăng mơgêi râ má pái phôh thong ƀă rah xo hok tro hriâm đăi hok, kao đăng hơnăm 2022.

A Sa Ly tơplôu ƀă tơbleăng