Tiô tơdroăng tối hdrối, Kuô̆k hô̆i kô tơmeăm Luât tơnêi (‘mâi hơ’lêh) a rôh hôp mê. La troh nôkố, tơdroăng tơkêa luât tơnêi (‘mâi hơ’lêh) xuân ối ai tơdroăng tơpui rơrá phá dêi rơpó, malối cho luât pơkâ xo tơvêh tơnêi xua tơdroăng ki vâ pơxúa dêi tơnêi têa, ‘na mơjiâng pro troăng prôk; ‘na tơdroăng ăm mơngế ki ê xúa tơnêi pêi chiâk, malối cho tơnêi pêt báu; ‘na hnoăng cheăng pêi pro ‘na xúa tơnêi a mơngế Việt Nam ki rêh ối a kong têa ê; lơ tơdroăng pơkâ yă tơnêi...

Xuân tung kơxo hâi lơ 3/11, mâu kăn veăng hnê tối a pơkâ hdró, pơkâ xúa tơnêi; ‘Na tơdroăng pêi pro tơkêa bro hngêi ối tê mơdró, tơdroăng tơkêa bro tơkŭm tá hngêi ối ƀă mơdró kâ, mơdró ki kố ki mê; ‘Na mơnhông tơƀrê, tăng pêi pro ai pơxúa ƀă rak ngăn tơnêi; ‘Na pro ăm Hlá mơ-éa mơnhên xúa tơnêi ăm mâu rơpŏng hngêi, mâu ngế ki dế xúa tơnêi ôh tá ai hlá mơ-éa xúa tơnêi, ôh tá pro xôi luât ‘na tơnêi, ôh tá xê tung tơdroăng pơcháu tơnêi ôh tá tro hnoăng pơkuâ...

Kuô̆k hô̆i hôp plâ hâi tung hâi lơ 3/11 tơpui ‘na tơdroăng tơkêa pro Luât tơnêi (‘mâi hơ’lêh)

Hên mâu kăn tối nhên, kố cho tơdroăng tơkêa Luât ki kal, pơkâ thế tơtrŏng khât tung séa ngăn tối tơbleăng. Tơdroăng tơbleăng tơdroăng tơkêa luât ki kố thế ngăn tiô kơ tơdroăng pro tơniăn tơƀrê tơdroăng tơkêa bro luât, ai tiô pơkâ ƀă hlối pêi pro.