VOV4.Xơ Đăng - Kơxê lơ 25/5, a pơlê kong kơdrâm Đà Lạt, Khu tơrŭm pêi cheăng kong pơlê Lâm Đồng hiăng tơkŭm po hneăng hôp kheăn kơdeăn ‘’Khu tê mơdró kum mơngế pêi cheăng’’ ki má môi hơnăm 2022. Nôkố, Lâm Đồng ai 11.850 khu tê mơdró, ƀă tâi tâng kơxô̆ liăn mơjiâng tơmeăm khoăng, tê mơdró châ 141 rơpâu rơtal liăn.

Kơnôm tơtrŏng tăng tíu mơ’no liăn cheăng, tơmâng tơleăng, tah lôi teăm tơdrêng mâu tơdroăng pá puât tơvâ tơvân ƀă pêi pro tơdâng tơ’mô mâu troăng hơlâ ‘na tŏng kum mơnhông mơdêk khu tê mơdró, mâu khu tê mơdró Lâm Đồng hiăng chôa ‘lâng mơnhông mơdêk ki tơ’lêi hlâu phá tơ-ê, kum kal khât tung tơdroăng pơ’lêh cheăng kâ, rak tơniăn tơdroăng rêh ối pơlê pơla, mơdêk pêi lo liăn, thăm mơnhông mơdêk cheăng kâ – rêh ối pơlê pơla dêi kong pơlê.

Lâm Đồng kheăn kơdeăn 30 khu tê mơdró kum mơngế pêi cheăng

A hneăng hôp 30 khu tê mơdró ki châ tơƀrê má môi tung mơjiâng pro tơmeăm tê mơdró, rak ngăn ăm mơngế pêi cheăng ƀă pơlê pơla hiăng châ kheăn kơdeăn. Tiô Liên đoân pêi cheăng kong pơlê Lâm Đồng, tơdroăng kheăn kơdeăn teăm tơdrêng mâu khu tê mơdró kố cho xiâm kối vâ mơhnhôk ƀă troh lâp lu tâ tơdroăng ‘’khu tê mơdró kum mơngế pêi cheăng’’ tung la ngiâ.

A Sa Ly tơplôu ƀă tơbleăng