VOV4.Xơ Đăng - Hâi lơ 7/7, Hô̆i đong kuăn pơlê kong pơlê Lâm Đồng hneăng X hiăng pơxiâm po hneăng hôp má 6 vâ tơpui tơno ƀă pơkâ mâu troăng tơleăng mâu tơdroăng pá puât, pơtối thăm mơnhông cheăng kâ – rêh ối pơlê pơla dêi kong pơlê mơnhông mơdêk. 6 khế apoăng hơnăm 2022, Tơdroăng cheăng kâ dêi Lâm Đồng châ tơƀrê hên. Tung mê, ki má môi cho tơdroăng cheăng kâ tơtêk 9,29%; xo hnoăng liăn tơnêi têa châ 7.800 rơtal liăn, tâk lối 22% tâng pơchông ƀă roh kố hơnăm hdrối.

Tâi tâng a roh hôp

Tâi tâng pêi lo liăn tê tơmeăm ngi kong têa ê xuân châ lối 436 rơtuh dollars, tâk 43%; ƀă tơmối ôm hyô châ lối 3,7 rơtuh roh ngế, tâk 86,5% tâng pơchông ƀă roh kố hơnăm 2021. Mâu kơvâ tơniăn tơdroăng rêh ối pơlê pơla, kơdroh kơtiê, gâk kring kal kí ƀă tơniăn tâi tâng pơlê pơla châ tơniăn. Pakĭng châ tơƀrê, Lâm Đồng xuân ối trâm hên tơdroăng pá puât, tơdroăng tá hâi tro, ki má lối ƀă tơdroăng gak ngăn kong, pơkuâ tơmeăm tung kơdâm tơnêi, tơnêi tơníu, pơkâ pêi ƀă hía hé.

Mâu kăn teăng mâ Hô̆i đong kuăn pơlê mơdoh hên chôu tơpui tơno, pro tơniăn mâu tíu ki kreăng

Hneăng hôp mơnhên kố cho tơdroăng ki ối kreăng kal châ tơkŭm po tơpui tơno, mơnhên, ti tăng troăng vâ rak tơniăn, thăm mơnhông cheăng kâ – rêh ối pơlê pơla mơnhông tơtêk.

A Sa Ly tơplôu ƀă tơbleăng