VOV4.Xơ Đăng - Ing apoăng hơnăm troh nôkố, kong pơlê Lâm Đồng hiăng ai lối 50 hrôh vâi ko kong, tung mê ai 14 hdrôh hâi ‘nâi ngế ki lâi pro xôi. Kơ koan khu râ pơkuâ cheăng hiăng pro hlá mơ-éa pơxâu 47 hdrôh tung mê ai 3 hdrôh  tơleăng pơxâu phâk, xo tơvêh lối 84m3 loăng pŭm tŭm túa ƀă xo liăn pơxâu mê nâp a hngêi rak liăn tơnêi têa lối 789 rơtuh liăn. Tung kơxô̆ ki mê, ki rơ iô má môi ai 5 tơdroăng ko ‘nhiê kong ki kân tung mâu tơring Lạc Dương, Dam Rông ƀă Bảo Lâm.

Lâm Đồng: ko ‘nhiê kong rơ iô ‘nâng, hdi tơnêi kong rế hên

Nôkố kơ koan kŏng an dế séa ngăn, pro hồ sơ vâ pơxâu mâu ngế pro xôi. Tiô Khu xiâm ngăn pêi chiâk deăng  ƀă mơnhông mơdêk thôn pơlê Lâm Đồng, ôh tá xê to ko  kong, tơdroăng hdi tơnêi kong xuân rế hên há. Ki xiâm xua mơngế kal vâ tê tơnêi ƀă yă tơnêi dế to kơnâ, hên ngế oh tá vâ rak tro luât, pêi mâu tơdroăng hdi tơnêi ƀă pơtối hdi tơnêi kong vâ tê xo liăn.  Ƀă mâu tơnêi ki mê, khu râ pơkuâ cheăng khŏm tơleăng mơnhên ƀă kô thế vêh pêt kong nếo, pơxâu kơtăng mâu ngế ki ai xôi.

Gương tơplôu ƀă tơbleăng