Troăng rah xo hok tro kô châ kong pơlê pêi pro rơdâ. Troăng tơ’noăng ra xo bu xúa ƀă mâu hngêi trung phôh thong râ má pái chuyên. Hơnăm hriâm kố kong pơlê Lâm Đồng ai lối 54.800 hok tro lâm 9; tơdroăng pơkâ rah xo hok tro mot lâm 10 mâu hngêi trung tơnêi têa dêi kong pơlê hơnăm hriâm la ngiâ cho vâ chê 45.000 hok tro. Tung mê, mâu hngêi trung phôh thong râ má 3 rah xo 42.500 ngế hok tro; 4 hngêi trung phôh thong râ má 3 chuyên tơ’noăng rah xo vâ chê 1.300 hok tro ƀă mâu hngêi trung phôh thông hdroâng kuăn ngo ai tíu kâ koi ối pơtê rah xo lối 1.000 ngế hok tro. Troăng pêi rah xo tiô pơlê.

A kơpong tơkăng kong pơla mâu cheăm bêng, hok tro châ kĭ pói vâ rah xo a mâu hngêi trung achê tíu ối. Tung pơla kĭ rah xo hok tro mot lâm 10 mâu hngêi trung tơnêi têa a kong pơlê Lâm Đồng châ pêi pro sap ing hâi lơ 25 – 30/5 ƀă troăng mơ’no tơdrêng tung um tiô troăng hyôh măng. Tơdroăng rah xo hok tro kô châ tơkŭm po sap hâi lơ 15 – 24/7 ƀă kêi đeăng tơdroăng rah xo hdrối hâi lơ 31/7. Kơ’nâi mê, mâu hngêi trung phôh thong râ má 3 mơngế krê, mâu tíu xiâm hnê hriâm đi đo, tíu xiâm hnê hriâm cheăng pêi a Lâm Đồng kô tơkŭm po rah xo hok tro ƀă kêi đeăng hdrối hâi lơ 31/8/2026.