A hneăng hôp, Tĭnh ŭy Lâm Đồng tơbleăng pơkâ mơjiâng Khu hnê mơhno mơgêi tơdroăng pêi pro Pơkâ kơxô̆ 18 ối tung Tĭnh ŭy Lâm Đồng xua pôa Nguyễn Thái Học, Pôu râng hnoăng Kăn pơkuâ hnê ngăn cheăng Đảng Lâm Đồng pro kăn pơkuâ po.

‘Na khô̆i khu râ kăn pơkuâ hnê mơhno tơdroăng rah xo, rơnêu bro ƀă chiâng môi Khu pơkuâ túa cheăng ƀă Mơ’no liăn cheăng ƀă Khu pơkuâ liăn ngân; Khu pơkuâ Troăng prôk ƀă rơxế kơtâu ƀă Khu mơjiâng tơmeăm; Khu pơkuâ Kế tơmeăm khoăng ƀă Kong prâi ƀă Khu pơkuâ ‘na pêi chiâk deăng ƀă mơnhông mơdêk thôn pơlê; Khu pơkuâ tơdroăng nếo ƀă hlá tơbeăng ƀă Khu pơkuâ Khoa hok ƀă Kŏng ngê̆; Khu pơkuâ Cheăng pêi, Mô đô̆i rong râ ƀă Rêh ối pơlê pơla ƀă Khu pơkuâ kăn ƀô̆. Tơdrêng amê, pơtroh tơdroăng pơkuâ tơnêi têa ‘na mâu kơvâ ối tung mâu khu cheăng ton chiâng mâu khu cheăng nếo tơtro. ‘Na mơnhên la ngiâ tơdroăng pêi cheăng kăn ƀô̆, vêh rah xo khu kăn ƀô̆ ƀă kơdroh ƀiên chê̆; rah xo mâu kăn ƀô̆ ƀă hiêm mơno ‘’ivá pêi cheăng chiâng, hiêm mơno lĕm, troăng pêi cheăng rơdêi, tơpui chiâng, pêi chiâng’’, kêi đeăng lĕm tro, kêi đeăng hôm hnoăng cheăng.