Vâ chê 250 kăn teăng mâ teăng mâ ăm 65.000 ngế đoân viên kŏng đoân kong pơlê Lâm Đồng troh veăng. Mơhé trâm ƀă hên pá puât xua tơdjâk xua pơreăng COVID-19, laga mâu khu râ Kŏng đoân kong pơlê Lâm Đồng hiăng mơ-eăm pêi pro ƀlêi trâng mâu hnoăng cheăng, troăng pêi, kêi đeăng ƀă tơkâ hluâ mâu pơkâ ki Pơkâ Hneăng hôp roh má IX Kŏng đoân kong pơlê hiăng pơkâ mơ’no.

Tung mê, ki má môi cho pêi lĕm tro hnoăng teăng mâ, rak ngăn, gâk kring hnoăng pơxúa, ki pơxúa tơtro luât, tơxâng dêi kŏng nhân, viên chưk, mơngế pêi cheăng. Ki nhên, hiăng ai vâ chê 79.000 roh ngế đoân viên, mơngế pêi cheăng châ kơ-êng, diâp kơxuô tơmeăm ing tơdroăng ‘’Têt tơkŭm trâm mâ’’; 46.500 roh ngế veăng rôe tơmeăm, xúa tơdroăng mơdró dêi 85 khu tê mơdró ƀă yă kơjo; tŏng kum mơjiâng, rơnêu 118 toăng hngêi ăm đoân viên, mơngế pêi cheăng ai tơdroăng rêh ối pá puât. Hneăng hôp hiăng rah xo Khu pơkuâ Liên đoân Pêi cheăng kong pơlê Lâm Đồng hneăng má X, hneăng hơnăm 2023 – 2028 ai 32 ngế.