Tơring Dà Huoai châ mơjiâng ing tơdroăng tơ’mot 3 tơring peăng Hdroh dêi kong pơlê Lâm Đồng, mê cho tơring Dà Huoai, Dà Teh, Cát Tiên. A rôh leh, Khu tơkŭm po tơbleăng pơkâ mơjiâng Đảng ƀô̆ tơring Dà Huoai. Pakĭng mê, Khu kăn pơkuâ hnê ngăn Đảng kong pơlê Lâm Đồng pơkâ hnê mơhno Khu kăn, khu pơkuâ cheăng, Kăn pơkuâ hnê ngăn Đảng, kăn phŏ pơkuâ hnê ngăn Đảng tơring Dă Huoai hneăng hơnăm 2020-2025.

Pôa Nguyễn Quý Mỵ (Kăn pơkuâ hnê ngăn Đảng tơring Dà Huoai ton nah) châ rah xo pro kăn pơkuâ hnê ngăn Đảng tơring Dà Huoai (ki nếo). tơbleăng a rôh leh, pôa Nguyễn Thái Học, Kăn pơkuâ hnê ngăn Đảng pơtân dêi kong pơlê Lâm Đồng tối, tơdroăng tơ’mot 3 tơring peăng Hdroh chiâng môi tơring ki nếo cho tơdroăng ki kal, pơ’lêh pêi tiô troăng hơlâ ki kân dêi Tíu xiâm tơnêi têa ƀă dêi kong pơlê.

Kố xuân cho rôh vâ tơƀrê, tơkŭm mâu tơmeăm khoăng liăn ngân kuăn mơngế vâ mơnhông cheăng kâ - rêh ối, veăng pro iâ mơngế pêi cheăng ăm tơnêi têa, mơdêk pêi cheăng tơƀrê, tung khu kăn ki nếo dêi tơring tung la ngiâ.