Tung péa hâi lơ 14 ƀă 15/7, Đảng ƀô̆ cheăm Đơn Dương, kong pơlê Lâm Đồng, tơkŭm po châ tơƀrê Hneăng hôp kăn teăng mâ roh má I, hneăng hơnăm 2025 – 2030. Kố cho hneăng hôp râ cheăm apoăng klêi kơ’nâi pêi pro tơmot chiâng môi kong pơlê ƀă pêi cheăng khu râ kăn péa râ ing hâi lơ 1/7.

Klêi kơ’nâi mơgêi, pôa Nguyễn Hòa Bình, Phŏ Ngế pro xiâm hnê mơhno má môi Chin phuh hiăng pơkuâ roh hôp xo vế túa ki rơkê tơtro, tối troăng po hneăng hôp troh 123 cheăm, bêng, pơlê kân lâp kong pơlê. Mâu kăn teăng mâ kheăn kơdeăn tơdroăng ki hbrâ dêi Khu pơkuâ tơdroăng cheăng Đảng kong pơlê ƀă Đảng ủy cheăm Đơn Dương. Xông tơpui a roh hôp, pôa Nguyễn Hòa Bình, Phŏ Ngế pro xiâm hnê ngăn tơnêi têa tối rơdêi, hneăng hôp ôh tá xê to tơdroăng kal kí dêi Đảng mê ối kal mơjiâng tơdroăng ki phiu ro tung kuăn pơlê.

 Hdrối hneăng hôp, kal pêi pro mâu tơdroăng tơ’noăng, kế tơmeăm koh phiu ro ki kal khât, ôh tá xê to ing kơxô̆ liăn mơ’no tơnêi têa mê tá mơ’no liăn kuăn pơlê, vâ veăng kum mơjiâng ivá mơnhông kong pơlê klêi kơ’nâi tơmot chiâng môi.