A khu pleăng mơheăm dêi Khoa Xét nghiệm, Hngêi pơkeăng kân kơpong Tây Nguyên, pôa Nguyễn Trọng Tân (cheăm Trường Xuân, kong pơlê Lâm Đồng) dế ối ‘nân tơkôm ngế ai mơheăm ki iâ ngế ai troh pleăng dêi mơheăm vâ  tŏng kum mơ’rêh dêi kơdrâi. Pôa tối, kơdrâi pôa tro u xơ tử cung, hên rôh lăm khăm la ƀok thái pơkeăng pơkâ thế kâ ôu tơ’nôm trếo kơhiâm vâ ai mơheăm, xua mơheăm iâ ôh tá chiâng vâ pâ, la jâ kố cho khu mơheăm ki iâ ngế ai mê ôh tá ai mơheăm vâ pâk ‘mot.

“Ƀok thái pơkeăng mơhnhôk mâu ngế tung rơpŏng hngêi nhŏng o hdrông hdrê  troh pleăng mơheăm, tâng ôh tá ai khu mơheăm ki mê kô pơ’lêh, klêi ăm xo mơheăm mê ƀok thái pơkeăng gak ngăn nôkố tung hnôu mơheăm xuân ôh tá ai khu mơheăm ki mê vâ pơ’lêh nôkố thế tơkôm tê. Tơkôm peăng Kâu lăk ƀô̆ krếo mê nếo troh ai môi ngế, hâi kô ai tơ’nôm môi ngế nếo troh”.

Tung kơpong pơlât dêi Khoa nhi Tổng hợp, jâ Đào Thị Mai ối a cheăm Ea Knốp, kong pơlê Dak Lak djâ dêi cháu kơdrâi 8 hơnăm tro tơprâ mơheăm xăp ing ối kŭn Thalassemia  tâ tú tiô hdrông hdrê xua ‘na mơheăm. Plâ 3 hơnăm kố, rêm khế, prế jâ cháu troh a hngêi pơkeăng vâ pâk ăm 2 tơdrong mơheăm, Rôh kố, mơheăm hiăng tâi, jâ thế tơkôm mâu ki pleăng dêi mơheăm tê veăng kơjo kum. 

“Drêng hrá ôh tá ai mơheăm kô khăng kơbrĕn chêng kŏng, klêa blung, vung vế ko. A thế djâ dêi cháu môi khế môi hdroh troh a Hngêi pơkeăng kân kơpong Tây Nguyên. Rôh kố, hngêi pơkeăng ôh tá ai mơheăm a thế pâ mơ-eăm mâu vâi miê xăng vâi o ki dế hriâm đại học Y dược pleăng dêi mơheăm”.

Tiô ƀok thái pơkeăng Đặng Việt Nam – Khoa Nhi tổng hợp, Hngêi pơkeăng kân kơpong Tây Nguyên, krê khoa ki kố nôkố pơlât dâng 100 ngế vâi hdrêng ki tơprâ mơheăm xap ối tơxĭn cho sap ing kot mâ. Tơdâng rêm ngế hdrêng ki kal pâk ‘mot mơheăm 1 troh 1,5 khế/hdrôh, ai mâu ngế ki râ ó thế pâk ‘mot 2-3 măng tĭng/hdroh. Rêm roh, dâng 40-50 ngế vâi hdrêng kal pâk ‘mot mơheăm, hên ngế xo 2-3 tơdrong mơheăm, tơ’mô vâ chê 1 lit mơheăm.

“Tơdroăng mơheăm tâk hên la ôh tá ai mơheăm. Ôh tá xê môi muăn châ pâk ‘mot môi tơdrong mơheăm mê ối ai muăn ki ‘nâ pâk châ 2 troh 3 tơdrong mơheăm. Xua mâu vâi muăn ki ‘nâ kơpêng 10 hơnăm kơxô̆ kĭ vâi muăn  hên, mơheăm pâk ‘mot kal pâk ‘mot môi hdroh xuân hên há. Vâ tối dế kal mơheăm ‘nâng”.

Tâng rêm khế, mâu hngêi pơkeăng tung kong pơlê Dak Lak kal vâ chê 2.000 tơdrong mơheăm vâ pâk ‘mot tơdrêng ƀă pơlât, tung mê, Hngêi pơkeăng kân kơpong Tây Nguyên hên tâ. Tíu xiâm Rak ‘măn mơheăm ƀă Pâk ‘mot mơheăm kal ai iâ 500 tơdrong mơheăm ki ‘măn kơdĭng vâ bê mơheăm ki hbrâ rơnáu ai ngế kal vâ mơheăm tơdrêng. Laga, sap apoăng khế troh nôkố, kơxô̆ mơheăm kal tơdah xo ôh tá bê tŭm, pro tơdroăng ôh tá ai mơheăm rế hên ó.

Hlo tơdroăng tíu xiâm ‘măn rak mơheăm ki vâ pâk ‘mot tơdrêng ƀă pơlât a mâu hngêi pơkeăng oh tá bê tŭm mơheăm, Vi ƀan kuăn pơlê dêi kong pơlê Dak Lak hiăng ai hlá mơ-éa pơtroh thế mơhnhôk hên ngế pleăng dêi mơheăm. Tơdrêng amê, Hngêi pơkeăng kân kơpong Tây Nguyên xuân chêh kơthô krếo thế kuăn pơlê veăng plĕng mơheăm. Ƀok thái pơkeăng H’Nương Niê-Ngế pơkuâ Khoa Xét nghiệm, Hngêi pơkeăng kân kơpong Tây Nguyên  ăm ‘nâi:

“Khoa xuân hiăng tối tơbleăng  ƀă Ngế pơkuâ  vâ tăng ‘nâi plĕng mâu tơdroăng, hdrối khoa vâ tơdah xo mơheăm a Khoa sap hâi môi troh hâi tơdrốu ƀă pêi cheăng ta kơhâi dế, má péa tơrŭm ƀă Tíu xiâm rak ngăn mơheăm pâk ‘mot mơheăm vâ mơhnhôk hên ngế veăng pleăng mơheăm; má pái cho krếo thế tâi tâng mâu đoân viên kŏng đoân tung tâi tâng hngêi pơkeăng veăng pleăng mơheăm tŏng kum mơngế. Vâ tối Hngêi pơkeăng hiăng ai mâu mơheăm vâ pâk ăm kuăn pơlê ki kal vâ mơheăm tơdrêng”.

Tung pơla dế ôh tá ai mơheăm ton, tơdroăng veăng tơmâng teăm tơdrêng dêi mâu kăn, kơvâ cheăng ƀă kuăn pơlê cho xiâm pơkâ vâ pơtối rak vế tơdroăng ối rêh ăm hrĭng ngế châi tamo. Rêm tơdrong mơheăm ki ăm ôh tá xê to kum tơkâ luâ tơdroăng ki hdrối vâ hlâ drêng hlo amê, mê ối cho tơdroăng pêi pro ki lĕm tơbleăng tuăn pâ veăng kum pơlê pơla.