VOV4.Xơ Đăng - Măng tĭng hdrối, Hô̆i đong hnê ngăn kong pơlê Lâm Đồng hiăng tơkŭm hneăng hôp tơdế hơnăm, cho vâ tơpui tơno ƀă mơ’no mâu troăng hơlâ ki vâ kơdroh tah lôi mâu tơdroăng ki ối ’ro, pơtối mơdêk tơdroăng pêi cheăng kâ - rêh ối pơlê pơla 6 khế mơ’nui hơnăm 2022. Tung mê, kong pơlê pơtối mơ’no pêi pro châ tơ-ƀrê tơdroăng xiâm dêi tơnêi têa ‘na mơjiâng thôn pơlê nếo, kơdroh kơtiê krá tơniăn ton, tơdjêp ƀă mâu tơdroăng ki mơnhông kơpong hdroâng kuăn ngo, kong ngo, malối tung tơdroăng pơkuâ ngăn, mơ’no pêi pro châ tơ-ƀrê khât kơxô̆ liăn ki hiăng châ Kuô̆k hô̆i, Chin phuh mơ’no.

Tiô tối tơbleăng a hneăng hôp má 6 Hô̆i đong hnê ngăn kong pơlê Lâm Đồng hneăng X, 6 khế apoăng hơnăm 2022, tơdroăng pêi cheăng kâ, rêh ối pơlê pơla dêi kong pơlê kố hiăng châ chiâng pêi pro hên mâu tơdroăng ki dâi khât. Tung mê, ki hlo nhên mê cho tơdroăng pêi cheăng kâ tâk châ 9,29%; pêi lo liăn ngân ăm tơnêi têa châ 7.800 rơtal liăn, tơ’mô 71,5% tiô tơdroăng riân ngăn dêi kong pơlê ƀă tâk châ lối 22% tâng vâ pơchông ngăn ƀă rơnó kố dêi hơnăm nah.

Tâi tâng kơxô̆ liăn ki mơ’no tê kế tơmeăm xuân châ lối 436 rơtuh USD, tâk châ 43%; ƀă tơmối mot ôm hyô châ lối 3,7 rơtuh ngế, tâk châ 86,5% tâng vâ pơchông ngăn rơnó kố dêi hơnăm nah. Mâu kơvâ ki tŏng kum tơdroăng cheăng kâ - rêh ối ăm kuăn pơlê, kơdroh kơklêa kơtiê, kring vế rak tơniăn pơlê pơla ƀă mâu tơdroăng ki ê.

Pakĭng mâu tơdroăng ki hiăng châ chiâng pêi pro mê, Lâm Đồng xuân ối trâm hên mâu tơdroăng xahpá, ki kơdroh, maluâ ƀă tơdroăng pơkuâ rak ngăn kring vế kong, pơkuâ ngăn kế tơmeăm, tung têa tơnêi, tơdroăng pơkâ hdró ƀă hên ki ê. Xông tơpui po roh hôp mê, pôa Trần Đức Quận, Ngế cheăng tung Tíu xiâm Đảng, Kăn pơkuâ hnê ngăn Đảng, Kăn hnê ngăn kong pơlê Lâm Đồng tối tiah kố, mê cho mâu tơdroăng ki ối tơvâ tơvân kal athế châ tơkŭm tơpui tơno, pro mơnhên vâ kơdroh tah lôi, thăm mơnhông mơdêk pêi cheăng kâ - rêh ối pơlê pơla, pôa Trần Đức Quận tối ăm ‘nâi:

‘’Á hneăng hôp kố, mâu kăn tung Hô̆i đong kong pơlê xuân hiăng hriăn plĕng nhên tung tơrêm tơdroăng, tơno tơnêng, tơpui leăng ki hleăng, tối nhên mâu xiâm kối ki khoh hiăng châ chiâng pêi pro, klêi mê, xuân tối mơnhên mâu tơdroăng ki ối tơvâ tơvân, po mâu troăng hơlâ vâ kơdroh tah lôi mâu tơdroăng ki ối tơvâ tơvân, mơnhĕn, ai túa pêi pro, troăng prôk ki tơniăn hlâu tung mơnhông pêi cheăng kâ - rêh ối pơlê pơla, cheăng kal kí, tơdroăng kring vế pơlê pơla tơniăn’’.

Tâ tá hneăng hôp má 6 Hô̆i đong hnê ngăn kong pơlê Lâm Đồng

A roh êng tiâ mơnhên mâu tơdroăng ki hiăng mơnhên, khu kăn hnê ngăn kong pơlê Lâm Đồng vêh mơnhên tối, xua ôh tá pêi pro kơtăng khât tung tơdroăng rak ngăn tơnêi ki kuăn pơlê hiăng pleăng ki vâ pro troăng mê khoh chiâng ai hên mâu tơdroăng ki ôh tá tro. Tung mê, pơlê kong kơdrâm Bảo Lộc ƀă tơring Bảo Lâm châ ngăn cho tíu ki ôh tá tơniăn, xua kuăn pơlê pleăng tơnêi vâ pro troăng prôk, klêi mê, ai khu ki xing xoăng tơnêi, vâ pro hngêi ƀă pêi pro ki ê. Tiô tơdroăng riân ngăn dêi mâu kơ koan ki ngăn ‘na tơnêi tíu dêi kong pơlê Lâm Đồng, ki vâ iâ hlái ai lối 50ha tơnêi dêi vâ chê 200 ngế ki pleăng tơnêi, tung mê, ai ngế ki pleăng dêi tơnêi chiâ troh 10h.

Tơdroăng ki rơhêng vâ tối akố, klêi kơ’nâi pleăng tơnêi, kuăn pơlê mơhnŏng po xêh troăng prôk, ok ƀê tong ƀă hnối tơdjêp ƀă mâu troăng prôk ki ê tung kơpong.

Pôa Trần Văn Hiệp, Kăn hnê ngăn Vi ƀan kong pơlê Lâm Đồng ai tối tiah kố, tơdroăng ki kuăn pơlê pleăng tơnêi pro troăng ki xiâm cho vâ pêi pro pơxúa krê, vâi klâ xing xoăng tơnêi ki mê vâ mơdró. Hên mâu tơring, pơlê kong kơdrâm pơrá pêi pro ôh tá tro tơdroăng vâ tơdah xo, pơkuâ ngăn tơnêi ki hiăng pleăng, tung pơla mê, mâu tơnêi tíu ki kố klêi kơ’nâi ai tơdroăng pơkâ mơdrếo xo hiăng ối tung tơdroăng pơkuâ ngăn dêi Tơnêi têa. Vâ kuăn pơlê, mâu rơpŏng hngêi, mơngế krê rak vế, pêi pro tung tơdroăng pro troăng prôk ki ôh tá tơniăn tiô pơkâ ƀă tơdroăng pơkâ dêi luât. Ing mê, khoh chiâng ai tơdroăng klâ xing xoăng tơnêi, vâ tê mơdró ăm vâi ki ê pro hngêi trăng, pêt tơmeăm khoăng.

Pôa Trần Văn Hiệp ai tối tiah kố:

’Tơdroăng pleăng tơnêi vâ pro troăng prôk ki xiâm kối cho vâ mơjiâng mâu kơpong, mâu tíu, mâu pơlê ki nếo vâ tơbleăng mơhno tíu ki ê pêi pro ƀối. Vi ƀan hnê ngăn mâu tơring Bảo Lâm, pơlê kong kơdrâm Bảo Lộc ăn phep mâu rơpŏng, mơngế krê, hơ’lêh tơdroăng ki xúa tơnêi pêi chiâk deăng chiâng tơnêi ối tá hâi tơniăn tro tiô mâu tơdroăng ki pơkâ ai tơdjâk. Ing mê, khoh chiâng ai hên tơdroăng tung pơkuâ ngăn vê hdró tơnêi tíu dêi kong pơlê kố, pro kuăn pơlê chiâng ôh tá lap tuăn, pro tơdjâk chiâng ‘mêi tro um méa dêi kong pơlê Lâm Đồng.

Kong pơlê xuân hiăng ai hlá mơ-éa hnê tối mâu kơvâ cheăng, mâu tơring, rak vế, pêi pro ƀối, tơtro tơdroăng ki ai tơdjâk troh tơdroăng klâ xing xoăng tơnêi ki nếo pơkâ apoăng khế 7. Kring vế, gak ngăn tơniăn hnoăng cheăng dêi kuăn pơlê, khu mơdró kâ la tơdrêng amê, hnối athế tơniăn ăm tơdroăng ki rak ngăn liăn ngân dêi tơnêi têa’’.

Chúa mơhrâm tơdroăng rak ngăn tơnêi ki kuăn pơlê pleăng vâ pro troăng prôk, khoh chiâng hlêk u ê ăm tơdroăng rêh kâ ối

Ing tơdroăng ki séa mơnhên ngăn mâu tơdroăng ki hiăng châ chiâng pêi pro tung hnoăng cheăng mơnhông pêi cheăng kâ - rêh ối pơlê pơla tung 6 khế apoăng hơnăm 2022 ƀă tơdroăng ăm ‘nâi hdrối hnoăng cheăng vâ pêi pro tung la ngiâ kố ah; Hô̆i đong hnê ngăn kong pơlê Lâm Đồng hiăng vâ môi tuăn tung troăng hơlâ rak vế, pêi pro hnoăng cheăng mơjiâng pêi cheăng kâ - rêh ối pơlê pơla 6 khế mơ’nui hơnăm 2022 ƀă tơdroăng ki kơdo mơ-eăm khŏm pêi pro klêi mâu hnoăng cheăng pơkâ ki Vi ƀan hnê ngăn kong pơlê hiăng vêh mơnhên tối; tơdrêng amê, mơnhên rơdêi mâu troăng hơlâ ki vâ pêi pro kal tơkŭm pêi pro tung mâu khế la ngiâ, môi tiah: Pơtối tí tăng séa mơnhên ngăn, vêh mơnhên tối mâu troăng hơlâ, hnoăng cheăng tro tiô pơkâ dêi Khu pơkuâ hnê ngăn Đảng kong pơlê ƀă Hô̆i đong hnê ngăn kong pơlê ‘na mơnhông mơdêk pêi chiâk deăng, rêh ối pơlê pơla, kring vế tơniăn ‘na tơdroăng rêh kâ ối, gak vế pơlê pơla hơnăm 2022; tơdrêng amê, séa mơnhên, tối mơnhên ‘na troăng hơlâ ki vâ pêi pro a tơrêm khế, rêm hneăng vâ pêi pro châ tơ-ƀrê khât tơdroăng pơkuâ hnê ngăn tung mơnhông pêi cheăng kâ-rêh ối pơlê pơla ƀă tơdroăng pơkâ hdrối tung mơ’no hrê liăn ngân dêi tơnêi têa hơnăm 2022.

Hbrâ rơnáu tung thâ rĕng mơjiâng troăng hơlâ ki vâ mơnhông ‘na pêi cheăng kâ - rêh ối pơlê pơla ƀă tơdroăng ki mơ’no hrê liăn ngân hơnăm 2023; pơkâ mâu tơdroăng ki mơ’no liăn cheăng tơchoâm tơnêi têa hơnăm 2023. Pơtối pêi pro châ tơ-ƀrê khât tơdroăng xiâm dêi tơnêi têa tung mơjiâng thôn pơlê nếo, kơdroh kơtiê krá ton, hnối pêi pro tơdrêng ƀă tơdroăng ki mơnhông kơpong pơlê cheăm hdroâng kuăn ngo, kong ngo, malối tung tơdroăng pơkuâ ngăn, pơkâ mơ’no châ tơ-ƀrê mâu tơdroăng xúa liăn ngân ki nếo châ Kuô̆k hô̆i, Chin phuh hiăng xing xoăng.

                                                                 VOV Tây Nguyên

Nhat Lisa tơplôu ƀă tơbleăng