Rôh hôp khu râ kăn xiâm ASEAN - Australia rôh má 3 phiu ro tơbleăng Túa pơkâ pêi pro 2020-2024. Tung hơnăm 2022, tâi tâng kơxô̆ liăn châ xo ing tê mơdró pơla péa pâ châ 101 rơtal dollars, tung pơla FDI dêi Australia mot tung ASEAN châ lối 2 rơtal dollars.

Pôa Anthony Albanese, Ngế pro xiâm hnê ngăn kong têa Australia tối nhên ngăn nhuô̆m ASEAN, tơhrâ kô tơbleăng tơdroăng cheăng tung la ngiâ ‘na tơrŭm cheăng kâ Đông Nam Á troh hơnăm 2040, mơjiâng ivá ăm tơrŭm cheăng ƀă kong têa tơrŭm tung la ngiâ tơrŭm tung tâi tâng pơla ASEAN- Australia.

A Rôh hôp khu râ kăn xiâm ASEAN – Khu lâp kong têa rôh má 13, rêm pâ tối troăng ngăn ƀă tơdroăng tơhrâ mơdêk tơdroăng tơrŭm tung hên kơvâ cheăng, ngăn nhuô̆m luât, mơdêk tơrŭm hbrâ ví ƀă mâu tơdroăng pơloăng mơnúa tung lâp plâi tơnêi. Pôa António Guterres, ngế xiâm chêh tôm xo rơkong khu lâp kong têa tối nhên, Khu lâp kong têa kal ai tơdroăng ki môi tuăn dêi mâu khu tơrŭm túa pơkâ hên kơvâ cheăng môi tiah ASEAN, ƀă pơkâ thế mơdêk rơdêi tơrŭm cheăng pơla péa pâ tung pêi pro mâu tơdroăng pơkâ mơnhông mơdêk krá tơniăn, tung mê, tơtrŏng tơrŭm cheăng ‘na hơ’lêh on tơhrik, hnê hriâm kơxô̆, khăm pơlât, tơdroăng cheăng pêi, rak vế tơdroăng ki ai hên sinh hok, pơkuâ ngăn ‘na kong mêi khía mơhot têa kân lân lu ƀă hên tơdroăng ki ê.

Tối nhên, Việt Nam cho tơnei têa tơrŭm cheăng ki kal, hbrâ rơnáu dêi ASEAN ƀă Khu lâp kong têa, pôa Phạm Minh Chính, Ngế pro xiâm hnê ngăn tơnêi têa tối nhên Việt Nam kô ôh tá la lâi kâi pơtê tơdroăng kơdo mơ-eăm ƀă hnoăng cheăng pôu râng tơdroăng rơkê khât, veăng kum ăm hnoăng cheăng tơdjuôm dêi Khu lâp kong têa, mơdêk tơdroăng ki veăng tung mâu tơdroăng rak vế hơniâp lĕm, tơdrêng amê hlối pêi klêi mâu tơdroăng cheăng a kong têa ê ki châ pơcháu.

Pa gong rôh hôp, hâi lơ 7/9, pôa Phạm Minh Chính, Ngế pro xiâm hnê ngăn Chin phuh hiăng ai rôh trâm pôa Anthony Albanese, Ngế pro xiâm hnê ngăn kong têa Australia ƀă ngế ki pơkuâ djâ khu kăn, ngế xiâm tơpui kâ kong têa Rusi cho pôa Sergey Lavrov.

*** Kơxê hâi lơ 7/9/2023, Kăn pơkuâ mâu kong têa ASEAN ƀă Khu tơrŭm cheăng hiăng veăng Leh mơgêi Hneăng hôp Khu râ kăn xiâm ASEAN roh má 43 ƀă mâu Hneăng hôp Khu râ kăn xiâm tơdjâk ƀă Leh pơcháu pro Kăn xiâm hnê ngăn ASEAN ing Indonesia mê ăm Lếo. Tung xông tơpui tơdah hnoăng cheăng Kăn xiâm hnê ngăn ASEAN tung hơnăm 2024, pôa Sonexay Siphandone, Ngế pro xiâm hnê ngăn kong têa Lếo tơbleăng tơdroăng pơxá dêi Hơnăm ASEAN 2024 cho ‘’Mơdêk tơdjêp ƀă pro tơná rơdêi tâ’’, tối mâu tơdroăng ki xiâm, kơjo ‘na mơdêk tơrŭm, môi tuăn ƀă hnoăng tíu xiâm ASEAN, mơdêk mơjiâng Pơlê pơla tơdjêp tâi tâng, mơ-eăm rơdêi xêh, krá tơniăn ƀă kâi trâng ƀă mâu pơloăng mơnúa, pro pơ’lêh rĕng, tah lôi tơdroăng pá puât tung kơpong.

Klêi kơ’nâi pái hâi pêi cheăng thâ ƀă kơtăng, Hneăng hôp Khu râ kăn xiâm ASEAN roh má 43 ƀă mâu Hneăng hôp khu râ kăn xiâm tơdjâk hiăng châ tơƀrê lĕm. Kơmăng hâi lơ 7/9/2023, pôa Phạm Minh Chính rơtế ƀă Khu râ kăn teăng mâ Việt Nam hiăng lo ing Indonesia vêh a tơnêi têa, mơgêi châ tơƀrê roh pêi cheăng veăng Hneăng hôp Khu râ kăn xiâm ASEAN roh má 43 ƀă mâu Hneăng hôp khu râ kăn xiâm ki tơdjâk.