VOV4.Xơ Đăng - Leh tơbâ 97 hơnăm Hlá tơbeăng kăch măng Việt Nam kơxo lơ 21/6, a Hà Nội, Khu pơtâng hnê tối tơdroăng kal kí tơnêi têa, Khu xiâm pơkuâ tơdroăng kal tiô troăng hyôh um tơvi, rơ’jíu ƀă Internet, Khu chêh hlá tơbeăng Việt Nam, Hlá tơbeăng Nhân dân tơrŭm tơkŭm po Leh mơhnhôk tơdroăng tơ’noăng ‘’Mơjiâng tíu mơhno túa lĕm tro tung mâu kơ koan chêh hlá tơbeăng tơmiât troh Leh tơbâ 100 hơnăm hâi Hlá tơbeăng kăch măng Việt Nam (21/6/1925 – 21/6/2025).

Leh mơhnhôk vâ mơdêk hlê plĕng, pôu râng hnoăng cheăng dêi khu râ kăn pơkuâ hnê ngăn cheăng Đảng, khu pêi cheăng Đảng, khu râ kăn pơkuâ kơ koan hlá tơbeăng, mơngế chêh hlá tơbeăng ‘na tíu cheăng, hnoăng cheăng, tơdroăng ki kal dêi khôi túa lĕm ƀă tơdroăng mơnhông mơdêk tơnêi têa, xuân môi tiah tơdroăng mơnhông mơdêk rêm kơ koan chêh hlá tơbeăng, ki kơnâ dêi mâu tơmeăm chêh hlá tơbeăng ƀă inâi ki kơnâ, ki loi tơngah dêi mơngế chêh hlá tơbeăng.

Ki xiâm cho mơjiâng kơ koan chêh hlá tơbeăng mơhno khôi túa lĕm tro, ngế chêh hlá tơbeăng mơhno khôi túa lĕm tro, thăm pêi pro ƀă troh lâp lu tơdroăng ki mơhnhôk, thăm veăng, mơjiâng tơdroăng tơ’noăng ki pơxúa păng ‘nâng ƀă kơnâ vâ mâu kơ koan chêh hlá tơbeăng pêi pro tro hnoăng dêi hlá tơbeăng kăch măng tung rak vế, mơjiâng ƀă mơnhông mơdêk khôi túa lĕm tro Việt Nam ki rơkê, pêng păm khôi túa hdroâng mơngế.

            A Sa Ly tơplôu ƀă tơbleăng