Tơdroăng pơchuât a rôh Leh ai tơbâ mâu tơdroăng ton nah, mâu hâi ki kố dêi 50 hơnăm hdrối, mâu lêng ƀă kuăn pơlê dêi kong pơlê Bình Định hiăng po troăng lăm plâ pro tơleăng lĕm pơlê kong kơdrâm Quy Nhơn ƀă kong pơlê Bình Định tung rôh lăm plâ rơnó hơngui hơnăm 1975.

Plâ ƀlêi trâng hâi lơ 31/3 pro tơleăng lĕm kong pơlê Bình Định cho tơdroăng ki lĕm dêi chuh ngiah pâ nhoăm tơnêi têa ƀă ing tơdroăng mơ-eăm ôh tá xâu, cho ƀai hơdruê ki lĕm ro ƀă tuăn mơno mơ-eăm tơplâ ta troh hlâ, ai pơxúa, tuăn mơ-eăm Kăch măng khên tơnôu dêi mâu lêng ƀă kuăn pơlê pin.

Kơ’nâi 50 hơnăm hâi châ tơleăng lĕm, Bình Định ai tơdroăng cheăng kâ kân ôh tá la lâi pơtê po rơdâ, ing môi kong pơlê kơtiê, troh nôkố hiăng mơ-eăm ối má 5/14 kong pơlê kơpong Peăng kơnhŏng  tơdế tơnêi têa  ƀă kĭng têa kơxĭ tơdế tơnêi têa ƀă ối má 25/63 kong pơlê, tung lâp tơnêi têa.

Veăng leh ƀă tơbleăng a rôh leh, pôa Nguyễn Trọng Nghiã, Ngế pơkuâ ngăn tơdroăng kal kí ƀă hnê mơhnhôk cheăng tíu xiâm khĕn kơdeăn kong pơlê Bình Định hiăng ai mâu tơdroăng pêi pro tơƀrê tung ‘mâi hơ’lêh tơdroăng cheăng, tơ’mot mâu khu ‘no liăn cheăng, mơnhông cheăng ƀă kơmăi kơmok, ôm hyô, hnê mơngế pêi cheăng tơƀrê, mơnhông khoa hok kơmăi kơmok, cheăng kâ kơxô̆.