VOV4.Xơ Đăng - Hâi lơ 12/5, Khu ngăn cheăng pêi mố đô̆i rong ƀă pơlê pơla tơrŭm ƀă Khu pơkuâ ngăn Đoân Droh rơtăm Kon Tum tơkŭm po “Hâi cheăng pêi hơnăm 2022” ăm mâu ngế pêi cheăng a kong pơlê. Hiăng ai lối 750 ngế pêi cheăng, sinh viên, mố đô̆i hbrâ vâ lo ing pro mố đô̆i, đoân viên droh rơtăm veăng.

Tung kơxô̆ ki kố ai 570 ngế pêi cheăng châ mâu tíu pêi cheăng rah xo tiâ mơnhên, kơ-êng tơdrêng ƀă kơxô̆ ngế pêi cheăng châ rah xo vâ chê 20%. Tung hâi, Khu tơkŭm po xuân ăm vâ chê 60 ngế pêi cheăng lăm pêi cheăng a kong pơlê Bình Dương.

Tiâ mơnhê, tơbleăng tơdroăng cheăng ăm mâu ngế pêi cheăng tung Hâi cheăng pêi

Pakĭng mê, ai 8 ngế pêi cheăng pêi pro châ tơdroăng ki rơhêng vâ rah xo pêi cheăng a kong têa Đài Loan. Tung hâi pêi cheăng, hiăng ai 49 khu mơdró kâ, mâu tíu pêi cheăng chêh inâi tơdroăng ki rơhêng vâ rah xo lối 5.200 tíu pêi cheăng tung kong pơlê ƀă a kong pơlê ki ê ƀă lăm pêi cheăng a kong têa ê tiô tơkêa.

Pakĭng mê, péa to hngêi trung Kao đăng, tíu ki hnê cheăng pêi ai tơdroăng ki vâ rah xo hnê tơdroăng cheăng hơnăm 2022 – 2023 ƀă lối 3 rơpâu ngế pêi cheăng.

Katarina Nga tơplôu ƀă tơbleăng