Lưh đoàn Đăk kŏng ƀô̆ 198 ki pro tíu pêi cheăng a cheăm Hòa Đông, tơring Krông Pač, kong pơlê Dak Lak. Mâu hơnăm hdrối nah, rơtế ƀă tơdroăng ki pêi klêi rơkê tơdroăng cheăng kal kí – tơdroăng cheăng lêng, Lưh đoân ối pêi tơƀrê tơdroăng cheăng hnê mơhnhôk.

Ing hơnăm 2021 troh nôkố, tíu pêi cheăng kố hiăng mơ-eăm pro 13 toăng hngêi pú tơrŭm, 14 toăng hngêi tuăn mơno hơ-ui pâ, 9 toăng hngêi tơrŭm ƀă péa to hngêi trung hriâm diâp ăm khu kăn pơkuâ ƀă kuăn pơlê ki vâi pro pro tíu pêi cheăng, ƀă tâi tâng kơxô̆ liăn ‘no pro cho 5 rơtal 610 rơtuh liăn. Pakĭng mê, tíu pêi cheăng hiăng tŏng gum lối 10 tâ̆n phái tung pơla báu tá hâi teăm tum ăm vâi krâ nhŏng o; lối chât rơpâu hâi pêi cheăng ‘mêng rơnêu troăng prôk, hno têa, veăng gum pêi xo tơmeăm ing chiâk deăng; tơkŭm po hên rôh khăm, hbru pơkeăng tê kơtê ăm lối 7 rơpâu ngế kuăn pơlê.

Mâu tơdroăng cheăng pêi pro ai pơxúa dêi Lưh đoàn Đăk kŏng ƀô̆ 198 a kong pơlê Dak Lak veăng gum rơtế ƀă kong pơlê pêi rơkê tơdroăng cheăng tŏng gum pơlê pơla, mê ối hnê hriâm khôi hmâ kăch măng ăm mâu rơxông nếo, tơkŭm hiâm mơno pâ nhuô̆m tơnêi têa, ‘mâi mơnhông tơrŭm pơla khu lêng ƀă kuăn pơlê.