A rôh hôp, hên ngế veăng tối tíu ki pá kân nôkố ôh tá xê a troăng hơlâ mê a tơdroăng tơkŭm pêi. Mâu hlá mơ-éa pro mê xuân ối hên mơdoh hâi chôu ăm kuăn pơlê ƀă khu mơdró; tơdroăng chêh ‘mot tung kơmăi  pơla mâu kơ koan hâi chêh tŭm tâi; tơdroăng  cheăng ƀă kơxô̆ ối pá hên; tung pơla mê tơdroăng tơdah xo pro hlá mơ-éa ăm kuăn pơlê  dêi mâu kăn ƀô̆, kŏng chưk hâi ai tiô tơdroăng púi vâ tung tơdroăng cheăng nếo nôkố.

Jâ Hồ Thị Nguyên Thảo, Phŏ kăn hnê ngăn Vi ƀan kuăn pơlê kong pơlê Dak Lak pơkâ thế mâu kơ koan, tíu pêi cheăng, kong pơlê mơdêk hnoăng cheăng  dêi ngế ối ako tung tơdroăng ‘mâi hơ’lêh luât; mơdêk séa ngăn, tâh ‘nâ, pro hlâu tê tơdroăng pro hlá mơ-éa; mơdêk tơdjêp, tối ăm ‘nâi tơdroăng chêh tung kơmăi pơla mâu tơdroăng ƀă tíu xiâm ‘măn rak tơdroăng chêh ‘măn dêi tơnêi têa; pơtối xong xoăng pro rế lĕm, rah mơngế kăn ƀô̆ ki tơtro ƀă tơdroăng cheăng pêi ƀă tơdroăng pơkâ pêi cheăng.