A Hngêi pơkeăng mâu Lêng kuăn pơlê kơpong Phú Quý, rêm hâi ai hrĭng ngế kuăn pơlê troh khăm ƀă pơlât mâu tơdroăng châi ki hmâ tro. Mâu hơnăm achê kố, kơvâ ngăn pơkeăng a rơlố hiăng ai hên pơ’lêh tơ ê ƀă tơdroăng ’no liăn rôe tơmeăm xúa tung khăm pơlât, po rơdâ hên lâm hnê kih thuât ƀă mơdêk tơƀrê khăm pơlât amê. Hên mâu ngế châi tamo hdrối nah thế pơtroh a tơnêi vâ pơlât nôkố hiăng ai tŭm tơmeăm pơlât, tơdroăng khăm apoăng ƀă pơlât hlối a rơlố, kum kuăn pơlê kơdroh kơxô̆ liăn ’no, chôu, hâi prôk khăm.

Pôa Nguyễn Văn Hải ối a thôn Quý Hải ăm ‘nâi, pơchông ƀă hdrối nah, nôkố tơdroăng khăm pơlât hiăng hlo hên tâ, mâu ngế cheăng khăm pơlât, khu ƀok thái pơkeăng pêi cheăng kơhnâ tá hiâm tá mơno, pro kuăn pơlê loi.

“Nôkố á troh khăm mâu ƀok thái pơkeăng tơpui hlế, pêi krâu, hlối ro, khăm klêi mê xo pơkeăng ôu ăm kuăn pơlê. Pơchông ƀă hdrối nah tơdroăng khăm pơlât a rơlố kô hiăng mơnhông tơƀrê tâ. Bú to mâu tơdroăng châi ki râ ó mê nếo pơtroh a hngêi pơkeăng râ kơpêng, xua tơdroăng khăm pơlât a rơlốu ối xơpá”.

Tơdroăng khăm pơlât mâu tơdroăng ki hmâ tro a kơpong Phú Quý nôkố vâ tối hiăng ai tiô tơdroăng púi vâ dêi kuăn pơlê. La ƀă mâu ngế châi râ ó môi tiah mơheăm ôh tá kơtâu troh a ngôa, mơheăm tơkŭm a plâi nuih lơ rong ó, ívá pêi cheăng ƀă tơmeăm khăm pơlât a kố xuân hâi ai tŭm. Tung pơla mê, chơ djâ vâ troh pơlât a hngêi pơkeăng a tơnêi ‘lâng kơnôm hên hyôh kong prâi ƀă hâi chôu tuk kơtâu, thăm nếo ai drêng ‘nâ thế kơnôm tơƀai trực thăng chơ vâ teăm pơlât mơ’rêh mơngế châi tamo châ rêh.

Tiô ƀok thái pơkeăng Bùi Thị Hảo, Ngế pơkuâ Hngêi pơkeăng mâu lêng kuăn pơlê kơpong Phú Quý, pơkâ thế ki kal nôkố, mơdêk tơdroăng pơlât tơdrêng amê hlối xúa “hâi chôu mêa’’ tŏng kum mơ’rêh mơngế châi tamo. Nôkố tíu khăm pơlât ối kal ai mâu ngế rơkê cheăng môi kơvâ trâu rơdâ tâ, malối ‘na hồi sức cấp cứu, tơmâng pơlât plâi nuih ƀă troăng veăn ngôa. Vâ tơkâ luâ xơpá mê, Hngêi pơkeăng mê hiăng tơrŭm ƀă Hngêi pơkeăng Bạch Mai krếo mâu ngế rơkê veăng hnê tơdrêng a rơlố hnê tŏng gum pơlât pơ’lêh klêng têa, hlối kơjo kum trâu rơdâ pơlât ngế kơdrâ đột qụy ăm khu ngăn pơkeăng a kong pơlê.

“Nôkố hngêi pơkeăng cheăm hiăng châ Hngêi pơkeăng Bạch Mai kơjo kum hnê tê kơtê ăm môi ekip ki hriâm vâ thăm rơkê tâ tung pơlât tơdrêng mơngế đột qụy tung mê ai môi ƀok thái pơkeăng ƀă môi ngế điều dưỡng. Pơla kố nah châ Khu xiâm ngăn pơkeăng pơlât tơmâng ‘no liăn rôe môi toăng kơmăi CT vâ pơlât tơdrêng ăm mơngế đột quỵ. Hngêi pơkeăng Bạch Mai xuân kơjo kum ăm tíu pêi cheăng khăm ngăn tối hdrối tung troăng hyôh măng, pơchuât tơdroăng hiăng klêi khăm ing hơngế, tối tro mâu tơdroăng châi kum rĕng châ pơlât klêi mâu rôh pơlât tơdrêng”.

Jâ Huỳnh Thị Phương Duyên, Ngế pơkuâ Khu xiâm ngăn pơkeăng Lâm Đồng ăm ‘nâi, kơpong Phú Quý nôkố ai 121 kăn ƀô̆, viên chưk kơvâ khăm pơlât, tung mê, ai 29 ƀok thái pơkeăng, cho kơpong ki ai kơxô̆ ƀok thái pơkeăng kơpêng chât rơpâu ngế kuăn pơlê hên má môi tung kong pơlê. Ƀă kơxô̆ mơngế pêi cheăng mê, kơvâ ngăn pơkeăng hiăng pêi cheăng ai tiô tơdroăng púi vâ khăm pơlât ăm kuăn pơlê a rơlốu, mâu lêng tơplâ ƀă kuăn pơlê pêi cheăng tơnăng ká a têa kơxĭ.

Hlo kal mơnhông tơƀrế rế ó, malối tung pơla Phú Quý mơdêk tơ’mot ôm hyô, kơvâ ngăn pơkeăng Lâm Đồng pơtối pêi ahdrối mơdêk ivá khăm pơlât, malối mơdêk ivá pơlât tơdrêng. Tiô jâ Huỳnh Thị Phương Duyên tối, Khu xiâm ngăn pơkeăng dế pâ thế ‘mâi rơnêu, pro hngêi pơkeăng ƀă rôe tơ’nôm tơmeăm khăm pơlât vâ ai tơmeăm lĕm tiô tơdroăng kal vâ khăm pơlât tung pơla ối a kơpong rơlố.

“Tơdroăng tơxâng hâk mơnê 100% kăn ƀô̆ ngăn pơkeăng dêi Phú Qúy hiăng châ Hngêi pơkeăng pơlât tơdrêng đột qụy Hngêi pơkeăng Bạch Mai hnê ăm pơlât tơdrêng ngừng tuần hoàn ƀă hiăng ăm chư̆ng chih. Pakĭng mê, Hngêi pơkeăng Bạch Mai xuân tơhrâ kơjo kum tê kơtê tâi tâng kơxô̆ liăn hnê ăm Phú Qúy troh hơnăm 2028”.

Tơdroăng tăng hên mơngế, hnê trâu tâ ƀă ‘no liăn rôe tơmeăm ôh ti xo to gum mơdêk tơbrê khăm plât ăm kuăn pơlê kơpong Phú Quý mê ối rak tơniăn ăm kuăn pơlê ki tơnăng ká ƀă tơmối pơla kơpong têa kơxĭ ki hơngế tơnêi. Kố xuân cho hbrâ ki kal vâ tơdroăng khăm pơlât a Phú Quý ai tiô tơdroăng kal vâ pơlât tơdrêng tung pơla ối a rơlố têa kơxĭ.