A kơbong rak vế tơdroăng khăm pơlât kơxô̆ 02, ƀok thái pơkeăng Võ Hồng Khắc,  Khoa Vật lý trị liệu Phục hồi chức năng, Hngêi pơkeăng Tâm thần kong pơlê Dak Lak (bêng Thành Nhất, kong pơlê Dak Lak) khăm, tiâ mơnhên ƀă chêh đơn pơkeăng ăm ngế ki châi tamo. Ƀok thái pơkeăng Khắc ăm ‘nâi, pơlât ngế tro pơreăng kôk rơxok tuăn ngo ôh tá tơniăn ôh tá xê ngăn tiô mâu tơdroăng pơlât mê kal tiô tơdroăng ki rơkê ƀă hâi khế séa ngăn ton, tơdroăng ki ôh tá mơhúa kô trâm drêng lâi ôh tá ‘nâi.

“Tung pơla pơlât pâ thế ngin séa ngăn ngế ki tro pơreăng kôk rơxok, mot ngăn tơrêm kơbong vâ khăm, séa ngăn. 8 chôu kơxo má rêm hâi, ngin athế troh a rêm kơbong pơlât vâ séa ngăn, êng vâi hiăng kâ kơxo má há, hiăng ôu pơkeăng há, mê tung ngoâ hlo hiăng tơniăn há. Tung pơla khăm, hên ngế ki tro pơreăng kôk rơxok ôh tá kâi mơdât dêi tơná drêng troh chôu tuăn ngoâ ôh tá tơniăn chiâng  rup ‘nhiê mâu ƀok thái pơkeăng drêng lâi ôh tá ‘nâi”.

Kơtăn ing Khoa Vật lý trị liệu Phục hồi chức năng dâng 50 mét, kơbong hngêi ki tâ tá châ pro ƀă mơeăm sắt cho Kơpong tíu ối koi dêi mâu ngế ki tro pơreăng kôk rơxok kơnốu dêi Hngêi pơkeăng Tâm thần kong pơlê Dak Lak. Tung dế ai kơnâng, điều dưỡng Phan Đình Tài dế vê ngăn kơtêi ƀă ăm ngế ki kôk rơxok ôu pơkeăng tro pơkâ. A kơxah ngoh ối hbáu xua ngế ki tro pơreăng kôk rơxok kâ a hơnăm nah.

“Hâi lơ 4/8/2025, drêng á mot vê ngăn kơtêi ăm môi ngế ki tro pơreăng kôk rơxok cho kơnốu, gá dế ‘mêi tung ngoâ mê gá rup ‘nhiê ƀă kâ a kơxah á kố, hiâ hmân ếo á nếo. Á xuân xâu môi iâ. Drêng hiăng tơniăn, rơtế ƀă rêm ngế ki ê veăng rup râng klâ gá, á pơhlêh dêi hmân ếo, xut dêi tíu hbáu ki tro rong pơtê môi iâ klêi mê á pơtối pêi dêi tơdroăng cheăng".

Lối péa hơnăm pơlât a Khoa Vật lý trị liệu Phục hồi chức năng, Hngêi pơkeăng Tâm thần kong pơlê Dak Lak, ngoh Nguyễn Văn Tôn (cheăm Dray Bhăng, kong pơlê Dak Lak) châ ƀok thái pơkeăng Khắc ƀă điều dưỡng Tài mơeăn pơlât, séa ngăn rêm hâi. Ngoh cho ngế ki hmôm ôu drôu, châ chăn chiâng hrế hrối tuăn mơno ôh tá ‘nâi ki klâi, ai drêng ‘nâ ôh tá kâi mơgât dêi hiâm ki tôu. Ngoh ôh tá chôu pâ hiăng to lâi xôh mâu ƀok thái pơkeăng, điều dưỡng athế rup râng vâ ngoh châ tơniăn. Ngoh Tôn tối tiah kố, tâng ôh tá ai tơdroăng hơ-ui ƀă hiâm mơno dêi mâu ƀok thái pơkeăng, mơni nôkố ngoh ôh tá ‘nâi tơná gá chiâng tiah lâi. Tung tơdroăng ki ro tơdroăng tamo hlo kơdroh, hbrâ rơnáu vâ châ lo ing hngêi pơkeăng, ngoh Tôn ƀriê lo têa mâ tối:

“Á hlo mâu ngế cheăng khăm pơlât, mâu ƀok thái pơkeăng a hngêi pơkeăng vâi kơhnâ krâu khât; tung mê ai ƀok thái Khắc ƀă điều dưỡng Tài đi đo tơmâng ngăn lăm khăm, pơlât krâu ƀă mơhnhôk á. Á rơhêng vâ kô kâi mơgât ôh tá ôu drôu xếo, tuăn ngoâ vêh tơniăn vâ rĕng châ vêh dêi ƀă rơpŏng hngêi".

Hngêi pơkeăng Tâm thần kong pơlê Dak Lak mơjiâng a hơnăm 2008, ai 100 to xoăng, koi pơlât ăm 100 ngế ki kôk rơxok. Hơnăm 2025, pakĭng lối 20.000 ngế troh khăm, pơlât, hngêi pơkeăng ối rak ngăn, pơlât ăm 17.000 ngế ki tâ ‘na pơreăng kôk rơxôk (khê̆n cho dây thần kinh phân liệt, ôh tá vâ tơpui ƀă kơbố ƀă hlâ lok tung pơlê pơla, tiô Tơdroăng pơkâ Tơnêi têa ‘na khăm pơlât. Hên ngế ki kôk rơxok hiăng prêi, vêh dêi ƀă rơpŏng hngêi kơnôm ing mơeăm dêi mâu ngế cheăng khăm pơlât, ƀok thái pơkeăng ƀă ngế pêi cheăng . Laga, xua tơdroăng cheăng krê mê hngêi pơkeăng xuân ối trâm pá ‘na mâu ngế cheăng, troăng tŏng gum liăn ngân ƀă tơdroăng tơpui tối dêi pơlê pơla. Ƀok thái pơkeăng Nguyễn Thị Luyến, Phŏ pơkuâ hngêi pơkeăng pâ thế ai troăng hơlâ tŏng gum vâ mơdêk tơƀrê tung khăm, pơlât ăm mâu ngế ki tro pơreăng kôk rơxok tung la ngiâ .

“Nôkố, Vi ƀan hnê ngăn kong pơlê Dak Lak ai troăng hơlâ tŏng gum kơjo liăn ngân bu gum to mâu ƀok thái pơkeăng, ƀă kơlo liăn gum tơ’nôm 5% liăn khế kâ rêm khế; tung pơla mâu ngế ki ê môi tiah điều dưỡng, kih thuât viên vâi tá hâi châ kâ liăn ki kố. Tung hngêi pơkeăng tâm thần, á hlo tơdroăng cheăng pơrá xơpá, tơbrêi môi tiah dêi rơpó, xua mê hngêi pơkeăng pâ thế Vi ƀan hnê ngăn kong pơlê ‘mêng rơnêu troăng hơlâ tŏng gum ăm điều dưỡng, kih thuât viên ƀă mâu ngế pêi cheăng rơtế châ pơxúa. Ing mê, mơhnhôk vâi vâ vâi hmiên tuăn ƀă dêi tơdroăng cheăng, ối pêi cheăng tơniăn a hngêi pơkeăng, pơtối khăm pơlât ăm mâu ngế ki tro pơreăng kôk rơxok, mâu ngế ki trâm ‘na tơdroăng ‘mêi tung tuăn ngoâ”.

Rêm hâi tơkâ luâ, khu mâu ƀok thái pơkeăng, mâu ngế pêi cheăng a Hngêi pơkeăng Tâm thần kong pơlê Dak Lak xuân dế tơkâ luâ ƀă mâu rôh ki gâk pơlât trâm hên xơpá, mơni kô tro ngế ki tro pơreăng kôk rơxok rup, ‘nhiê, kâ drêng lâi ôh tá ‘nâi. Maluâ tiah mê, ƀă hnoăng cheăng pôu râng ƀă ivá khŏm mơeăm dêi ngế ƀok thái pơkeăng, vâi xuân ối kơhnâ ƀă dêi tơdroăng cheăng, rak ngăn pơlât krâu vâ hên ngế ki tamo ‘na tuăn ngoâ ôh tá tơniăn chiâng tơniăn, tuăn ngoâ vêh lĕm ƀă châ vêh dêi ƀă rơpŏng hngêi, pơlê pơla.