Tơdroăng kố ôh tá xê to gum rak ngăn ivá ăm kuăn pơlê kơpong pá puât mê ối thăm tơrŭm khu lêng – kuăn pơlê, troh lâp lu um méa ngế lêng Mô đô̆i gâk tơkăng kong achê kuăn pơlê, ôi rêh ƀă kuăn pơlê tíu tơkăng kong. Thươ̆ng ŭi, Ƀok thái pơkeăng khu lêng Lê Quang Tùng, ngế gum cheăng khăm pơlât tung khu lêng, Ƀơrô ki gum parŏng – Kih thuât, Mô đô̆i gâk tơkăng kong dêi kong pơlê Gia Lai tối ăm ‘nâi, tung roh kố, khu râ kăn pêi cheăng tơkŭm khăm pơlât, hnê mơhno ƀă xing xoăng pơkeăng tê kơtê ăm dâng 500 roh ngế.

Pakĭng tơdroăng rak ngăn ivá, kăn ƀô̆, mâu lêng Đông Mô đô̆i gâk tơkăng kong Ia Pnôn xuân pêi pro pơtâng tối, mơhnhôk kuăn pơlê pêi tiô troăng pơkâ dêi Đảng, troăng hơlâ luât dêi Tơnêi têa; mơdêk hlê plĕng kơchăng, thăm veăng gâk kring troăng tơkăng kong, tơneăn, rak tơniăn kơpong tơkăng kong.