A hên kơpong kuăn pơlê ối, ôh tá pá vâ châ trâm hlo mâu tơmeăm xúa chiâng kơdoăng têa môi tiah rơxô, vó kân, kơtôu chêng rơxế ki hiăng ton… ki hvât lôi klêi mâu rôh kong mêi apoăng rơnó. Mê cho mâu tíu ki tri trô vâ kơtâ chiâng kiâ ngu ngê̆ng - xiâm tri trô  pâk ‘mot  pro chiâng tơngê lo mơheăm. Tiô ăm ‘nâi, mơhé hâi troh  rơnó ki hên ngế tâ pơreăng, la kơxô̆ mơngế tơngê châi klêa hiăng pơxiâm hlo tâk iâ tâng vâ pơchông ƀă khế apoăng hơnăm. Malối, a mâu kơpong hngêi ki ăm vâi mung ối, kơpong ai hên kuăn pơlê ối, ki tơ’lêi tâ tú mê thăm rế hên tâng ôh tá kâi mơdât pơreăng thế rak krúa lĕm hyôh kong prâi. Riên sap apoăng hơnăm 2026 troh nôkố, tơdroăng séa ngăn tâ tú pơreăng dêi Khu xiâm ngăn pơkeăng tối ai vâ chê 32.000 ngế tơngê lo mơheăm, tung mê ai 4 ngế hlâ.

Pơla rôh kong tô pơ’lêh mêi môi tiah nôkố hmâ hlo tơ’lêi tâ pơreăng, xua pơreăng hâi tâ tú hên. Laga, kô cho rôh ki tro vâ hbrâ mơdât. Tâng tơngôu ôh tá vâ rĕng tơmâng, pơreăng kô tâ tú rĕng drêng troh a rơnó ki tâ tú hên tung mâu khế la ngiâ. Ƀok thái pơkeăng Đặng Hồng Hường-Phŏ pơkuâ Tíu xiâm ngăn pơkeăng kơpong Văn Yên, kong pơlê Lào Cai ăm ‘nâi:

“Ngin tăng ‘nâi plĕng ăm Đảng ủi, mâu kăn cheăm hnê ăm mâu ƀơrô, khu pêi hnoăng cheăng rak ngăn, tăng ‘nâi plĕng, tăng ngăn đi đo vâ ‘nâi pơreăng tâ tú tung kuăn pơlê vâ rĕng châ ‘nâi ai mâu tíu tâ pơreăng klêi mê xôh pơkeăng teăm kơdê pơreăng. Pêi tro tơdroăng hnê tối troh kuăn pơlê, mâu kăn vâ mơdêk hlê plĕng ƀă rơtế tơdjuôm dêi rơpó hbrâ mơdât pơreăng”.

Pakĭng tơngê lo mơheăm, ai mâu pơreăng tâ tú ki ê xuân tâ tú hên tung rơnó tô, malối a vâi hdrêng, cho pơreăng tơhê̆n kŏng chêng rơkong. Tiô Khu xiâm ngăn pơkeăng, sap ing apoăng hơnăm  2026 troh nôkố, lâp tơnêi têa tối ai dâng 26.000 ngế tâ pơreăng 8 ngế hlâ xua tơhê̆n kŏng chêng rơkong. Krê khế 3/2026, kơxô̆  mơngế tro tâ tú pơreăng riên tiô măng tĭng tâk tâng vâ pơ chjông ƀă khế hdrối. Pơreăng tơhĕn kŏng chêng rơkong tâ tú tơkâ luâ troăng rơkong troh klêa, tơ’lêi tâ pơreăng a mâu tíu păn roăng hên vâi hdrêng, hngêi trung mầm non tâng ôh tá mơdât rak ngăn krâu mơgrúa krúa lĕm. Tơdroăng tô tuăn cho pơreăng kŏng chêng rơkong  kô tâ tú rĕng, pro chiâng châi tơdroăng ki ê tâng ôh tá teăm pơlât prêi tơdrêng. Mơhé ti mê, mâu ngế nôu xuân tơngôu tá vâ rĕng tơmâng, ‘nâ nhôm tro mâu pơreăng ki ê a kéa ki hmâ tro. Tiê̆n sih ƀok thái pơkeăng Nguyễn Văn Lâm, Ngế pơkuâ Tíu xiâm ngăn pơreăng nhiệt đới, Hngêi pơkeăng Nhi Trung ương ăm ‘nâi:

“Ki tâ tú pơreăng tơhê̆n chêng kŏng rơkong cho ing troăng rơkong ing troăng kâ kế ƀă ing têa  hé dêi ngế pú kơtĕng drêng tơpui ‘nâ têa hé mê hiăng tro vi rus ƀă kô tâ tú  ing ngế ki kố troh ngế ki ê. Ƀă pơreăng tơhê̆n kŏng chêng rơkong hâi teăm ai vaccine pâk mơdât mê thế hbrâ mơdât pơreăng cho ki tro má môi. Tá mâu  pơreăng tơhê̆n kŏng chêng rơkong hiăng tro nah xuân ối tro nếo  xua pơchêh pơtong dêi pơreăng tơhê̆n kŏng chêng rơkong ôh tá xê têa ki lĕm’’.

Pakĭng ing kuăn pơlê hbrâ rơnáu dêi, kơvâ ngăn pơkeăng xuân dế tơbleăng hên troăng vâ tăng ngăn mơdât pơreăng ing apoăng. Sap ing séa ngăn pơreăng tâ tú, troh xôh pơkeăng  tíu tâ tú kŭn, troh mơdêk hnê hbrâ mơdât pơreăng tung kuăn pơlê. La tiô mâu ngế rơkê, ai pơxúa dêi tơdroăng hbrâ mơdât pơreăng ki kơ nôm tơngah  a hlê plĕng dêi rêm ngế kuăn pơlê.

Pơreăng tâ tú a rơnó tô mơdrăng ôh tá tâ tú kơdrâ, mê hmâ chôa tâ tú chôa iâ ing mâu tơdroăng ki kŭn tung rêh ối rêm hâi. Xua mê, séa ngăn pơreăng tâ tú ôh ti xê to pêi pro drêng hiăng ai pơreăng, cho thế hbrâ mơdât ing  nôkố. Phŏ yăo sư tiĕn sih Trần Đắc Phu, ngế tơpui rơkê dêi Tíu xiâm tối tơdroăng ‘na hbrâ mơdât pơreăng tung kuăn pơlê, Khu xiâm ngăn pơkeăng tối pơchân:

“Pin kal thế hlê ƀă mơhno ăm hlo nhên ‘na hbrâ mơdât pơ reăng ăm tơná hbrâ mơdât pơreăng ăm kuăn pơlê, hbrâ mơdât tơdroăng châi ăm khu ngế tơ’lêi tro. Pơtoh môi tiah vâi hdrêng, môi tiah vâi kơdrâi dế mơ-êa, mơngế ki kơdroh miễn dịch ƀă malối mâu ngế hiăng krâ, mâu ngế hiăng ai tơdroăng châi hdrối tung châ mê thế đi đo hbrâ mơdât pơreăng. Xua mâu nế ki mê drêng tâ pơ reăng hmâ  tro râ ƀă pin thế  mơgrúa lĕm đi đo châ chăn tơná, tơdroăng ki a tối pơchân cho thế kơhnâ kơpuih văng plông hngêi, xut lĕm hngêi trăng tơmeăm xah hêi dêi vâi hdrêng. Nôkố pêi pro tơdroăng kâ tô ôu chên thế xếo kŏng ƀă kơbŏng ƀă pin thế pâk vaccine tŭm’’.

Khế 5 cho khế pơ’lêh rơnó- cho rôh ki tro vâ mơdât pơreăng hdrối vâ troh rơnó tô. Rak krúa lĕm châ chăn, ƀă tíu rêh ối, kâ tôu ôu chên ƀă hbrâ ngăn đi đo dêi ivá, mâu tơdroăng pêi pro ngah lơ hlâu mê cho “hlá tât” ki tơƀrê má môi. Hbrâ ing apoăng, ing hơngế - mê cho ki vâ rêm ngế kuăn pơlê veăng rak vế dêi ivá ăm tơná, ăm rơpŏng hngêi ƀă tá kuăn pơlê.