*Vi ƀan hnê ngăn kong pơlê Gia Lai nếo pơkâ túa pơtroh mâu ƀok thái pơkeăng troh pêi cheăng ai khế hơnăm a mâu tíu khăm pơlât cheăm, bêng vâ thăm mơdêk ivá pêi cheăng khăm pơlât a cheăm bêng ƀă mơdêk ki rơkê plĕng tung khăm pơlât ăm kuăn pơlê. Tiô pơkâ, hơnăm 2026 kong pơlê kô pơtroh 38 ngế ƀok thái pơkeăng lo ing mâu hngêi pơkeăng, tíu cheăng khăm pơlât ƀă mâu tíu khăm pơlât dêi tơnêi têa lăm troh tŏng gum cheăng a 30 to cheăm bêng ối kal tơdroăng ki châ kơjo.

Dế kố tung lâp kong pơlê ai 135 to tíu khăm pơlât ƀă dâng 370 tíu khăm pơlât, la xuân ối ai 4 to tíu khăm pơlât tá hâi ai ƀok thái pơkeăng ƀă 76 to tíu khăm pơlât tá hâi xoăng tŭm mâu ƀok thái pơkeăng lăm troh pêi cheăng. Cheăng pơtroh mâu ƀok thái pơkeăng kô veăng gum mơdêk ki tơƀrê tung cheăng khăm pơlât apoăng, kơdroh pá ‘na pơhlêh tíu khăm pơlât ƀă mâu ngế ki châi tamo tiah hmâ.

Mâu ƀok thái pơkeăng kô châ pơtroh veăng hnê ‘na tơdroăng cheăng ăm mâu ngế cheăng a tíu khăm pơlât cheăm bêng. Túa pơkâ kơjo gum mâu cheăm kơpong hngế hngo, cheăm tơkăng kong ƀă kơpong hdrông kuăn ngo.

*Kơvâ khăm pơlât kong pơlê Dak Lak dế pêi pro Khế khăm pơlât rêm hneăng ăm kuăn pơlê tiô Tơdroăng xiâm tơbleăng a rôh hôp kơxô̆ 72 dêi Khu pơkuâ xiâm Đảng. Tơdroăng mơhnhôk ƀă rah khăm ăm mơngế hơnăm hiăng krâ châ tơkŭm po a bêng Tân An, bêng Tuy Hòa, cheăm Krông Bông ƀă cheăm Đồng Xuân vâ xo vế túa ki rơkê tơtro ahdrối vâ pêi pro tung lâp kong pơlê sap ing hâi lơ 1/7.

Mâu tíu khăm pơlât hbrâ tŭm mơngế pêi cheăng, tơmeăm khoăng ƀă tơmeăm gum tung khăm pơlât ivá. Khu ki kơjo mơngế hơnăm hiăng krâ, mơngế ai hnoăng tơnêi têa, mơngế chó chêng tơvê kŏng, rơpŏng kơtiê, rơpŏng vâ chê kơtiê, mơngế tro tâ pơreăng ôh tá ai pơkeăng pơlât prêi, kuăn pơlê hdroâng kuăn ngo ƀă mơngế a kơpong pá puât.

Khu pơkuâ ngăn pơkeăng ƀă khăm pơlât hiăng mơjiâng pơkâ pêi inhên, xing xoăng hnoăng cheăng ăm mâu tíu cheăng, rak tơniăn tơdroăng pêi pro châ tơƀrê a 102 cheăm, bêng tung kong pơlê.