Hôp tơno tơdroăng kal xiâm Khu râ kăn xiâm rôh kố ai kơnâ kal khât vâ mơdêk tơrŭm Khu tơrŭm cheăng ton xŏn ASEAN – Rusi, pro i krá tâ tơkêa kal kí, pro nếo tơrŭm ƀă mơnhên troăng prôk ton xŏn la ngiâ ăm tơrŭm ASEAN – Rusi hneăng la ngiâ a pái tơdroăng ki xiâm Kal kí – gâk kring tơniăn, cheăng kâ ƀă khôi túa lĕm tro – rêh ối pơlê pơla.

Klăng rôh veăng Hôp tơno tơdroăng kal, pôa Lê Minh Hưng, Ngế pro xiâm hnê ngăn tơnêi têa tiô tối hdrối ai mâu rôh trâm mâ tơpui tơno, pêi cheăng ƀă khu râ kăn pơkuâ kong têa Rusi ƀă Kŏng hoa Tatarstan; mơnhên Việt Nam đi đo nhuô̆m tơrŭm nhŏng o tiô khôi vâi krâ nah, Khu tơrŭm cheăng ton xŏn tâi tâng ƀă Rusi ƀă pói vâ rak, pro krá tơrŭm tung mâu kơvâ cheăng xua pơxúa tơdjuôm dêi péa hdrông mơngế, veăng gum hên ăm hơniâp lĕm, tơniăn, tơrŭm ƀă mơnhông a kơpong ƀă a lâp plâi tơnêi.