A kơpong ki ai xâu xía ki rơ-iêo pro 3 ngế kŏng nhân hlâ ƀă 2 ngế kŏng nhân dế hía, tơdroăng tí tăng xuân ối châ pơtối. A kơxê măng lơ 31/12 khu ki tŏng xo ƀă mâu ngế mui tăng ki rơkê dêi Kŏng an kong pơlê Kon Tum nếo tăng hlo châ dêi 2 ngế kŏng nhân tung tíu ki têa trâu kĭng chêng long têa hngêi kơmăi.

Maluâ rĕng hêng hlo la tơdroăng ki tăng tŏng xo hiăng tro pơtê a kong măng xua kong hiăng măng ƀă hyôh kong prâi hngíu. Pôa Lê Như Nhất, Kăn pơkuâ Khu ngăn cheăng kơmăi kơmok tê mơdró kong pơlê Kon Tum ăm ‘nâi, rơtế ƀă tơdroăng cheăng tí tăng 2 ngế kŏng nhân ki dế hía, Vi ƀan hnê ngăn kong pơlê xuân hiăng hnê mơhno mâu tíu pêi cheăng ki ai tơdjâk troh ‘mâi mơnhông tơdroăng ƀă mơnhên xiâm kối chiâng ai tơdroăng ki xâu xía tung pêi cheăng.

Khu pơkuâ hnê ngăn cheăng Đảng Đăk Glei, ăm ‘nâi rơtế ƀă ivá mơdêk tơdroăng ki tăng 2 ngế kŏng nhân dế hía, rak vế tơniăn a kong trường, khu kăn pơkuâ ƀă khu ki ‘no liăn pro hngêi kơmăi on tơhrik Đăk Mi 1 cho Kŏng ti tơlo liăn Quang Đức Kon Tum xuân dế pơtối kơ-êng, mơhnhôk rơpŏng hngêi mâu kŏng nhân ki trâm xâu xía.