Tơdroăng kố kum khu mơdró kâ, Khu pêi cheăng tơrŭm, rơpŏng kuăn pơlê ki pêi chiâk tung lâp tơnêi têa tơdjêp tê mơdró ƀă tê kế tơmeăm tơƀrê. Măng tĭng kế tơmeăm OCOP ƀă kế tơmeăm ki xiâm dêi mâu kơpong hơnăm 2023 ai 439 khu mơdró kâ veăng ƀă vâ chê 1.200 to kế tơmeăm, tung mê OCOP ai 756 kế tơmeăm châ sap ing 3 – 5 hơlŏng.

Tung rôh po mơdĭng kố ối po mâu tơdroăng tơrŭm cheăng hnê ‘na khoa hok kơmăi kơmok ‘na pêi chiâk deăng ƀă mơnhông thôn pơlê; pro tơ’lêi hlâu ăm khu mơdró kâ Pơlê kong kân Hồ Chí Minh ƀă mâu kong pơlê, pơlê kong kân tăng ‘nâi, ‘no liăn pêi cheăng tung mâu tơdroăng tơkêa pêi chiâk deăng xúa kơmăi kơmok chal nếo, tro ƀă tơdroăng ki uâ pơliê mâu kế tơmeăm pê lo ing chiâk deăng dêi 38 to kong pơlê, pơlê kong kân.

Ing mê, tối nhên hnoăng cheăng tíu tơdjêp tơƀrê, tíu pơkâ mơdêk tê mơdró ki kal dêi Pơlê kong kân Hồ Chí Minh tung kơvâ pêi chiâk deăng dêi mâu kơpong tung lâp tơnêi têa.

Kơxo hâi lơ 27/10, a Hà Nội, Tíu xiâm mơhnhôk tê tơmeăm pê lo ing chiâk deăng, Khu xiâm ngăn pêi chiâk ƀă mơnhông thôn pơlê tơrŭm ƀă Ƀơrô xing xoăng tơdroăng cheăng mơjiâng thôn pơlê nếo Tíu xiâm, Khu ngăn pro têa măm sap ton nah dêi Việt Nam tơkŭm po “Măng tĭng leh tơbleăng, tơdjêp kế kâ Việt Nam ăm mâu tơmeăm pro têa măm tiô hmâ ton nah, mâu kơchâi kâ ki hmâ dêi rêm kơpong’’.

Kố cho rôh tơbleăng mơhno mâu tơdroăng cheăng pêi pro vâ chiâng têa măm ƀă kơchâi kâ ing têa măm dêi Việt Nam troh mơngế rôe xúa km hlê plĕng, pơtối rak tơdroăng pêi pro ƀă mâu túa lĕm tro dêi Việt Nam troh mâu tơmối tung tơnêi têa ƀă kong têa ê. Măng tĭng po leh tơbleăng cho tung mâu tơdroăng cheăng pêi dêi tơdroăng Pơkâ dêi tơnêi têa mơjiâng thôn pơlê nếo hơnăm 2023, veăng mơdêk tê mơdró, tơdjêp rơtế rôe têa măm ƀă kế kâ ing têa măm.