Kơxê lơ 12/11, a pơlê kong kơdrâm Plei Ku, Khu pơkuâ hnê ngăn cheăng Đảng kong pơlê Gia Lai ƀă Hok viê̆n Chính trĭ Kuô̆k ya Hồ Chí Minh tơkŭm po hôp tơpui tơno khoa hok mơnhông krá tơniăn ôm hyô khôi túa lĕm tro ƀă ôm hyô ngăn loăng pơlái kong kế krá tơniăn kơpong Tây Nguyên tung hneăng nôkố. A kố, 50 tham luâ̆n dêi mâu ngế cheăng khoa hok, khu pơkuâ, khu tê mơdró ôm hyô hiăng ai mâu tơdroăng veăng kum ki kơnâ ‘na hriăn plĕng ƀă tơdroăng ai khât nôkố ‘na ôm hyô Tây Nguyên.

A hneăng hôp tơpui tơno, mâu ngế ki rơkê, mâu ngế cheăng khoa hok tơkŭm tối tơbleăng, tơpui tơno ‘na mâu tơdroăng môi tiah troăng tơmiât pêi ‘na mơnhông krá tơniăn ôm hyô, khôi túa lĕm tro ƀă ôm hyô ngăn loăng pơlái kong kế; tơmeăm ki ai hlâu ƀă ti tăng, xúa mâu tơmeăm ăm mơnhông ôm hyô khôi túa lĕm tro ƀă ôm hyô ngăn loăng pơlái kong kế kơpong Tây Nguyên; Mơnhên tơmeăm ƀă tơdjêp mơhnhôk mơđah tơbleăng vâ mơnhông krá tơniăn ôm hyô kơpong Tây Nguyên; Kum pro tơ’lêi hlâu vâ cheăng, tơdroăng pơloăng mơnúa ƀă mâu tơdroăng pơkâ mơ’no tung mơnhông krá tơniăn ôm hyô khôi túa lĕm tro, ƀă ôm hyô ngăn loăng pơlái kong kế kơpong Tây Nguyên tung pơla nôkố; Mơnhên troăng pêi la ngiâ, troăng mơnhông krá tơniăn ôm hyô khôi túa lĕm tro, ôm hyô ngăn loăng pơlái kong têa kơpong Tây Nguyên;...

Mâu ngế ki pêi cheăng, ngế hriăn plĕng, khu pơkuâ xuân veăng tơpui hên, pơkâ thế troăng ‘na mơdêk pơtâng tối, mơdêk hlê plĕng dêi pơlê pơla kuăn pơlê ‘na mơnhông krá tơniăn ôm hyô khôi túa lĕm tro, ôm hyô ngăn loăng pơlái kong kế; pêi kêi đeăng troăng pơkâ pêi, troăng hơlâ, mơjiâng ivá mơnhông hnoăng dêi pơlê pơla kuăn pơlê tung mơnhông ôm hyô krá tơniăn ƀă rak vế ƀă mơnhông ki kơnâ khôi túa lĕm tro tung pơlê, mơjiâng thôn pơlê nếo.