VOV4. Xơ Đăng - Kơxo lơ 8/6, Khu xiâm pơkuâ hnê hriâm ƀă Hnê mơjiâng tuăn ngôa rơkê tơkŭm po hneăng hôp mơ’no tơdrêng tung um tơvitiô troăng hyôh măng ‘na tơdroăng tơkŭm po tơ’noăng mơgêi râ má pái phôh thông hơnăm 2022. Veăng hneăng hôp ai Khu hnê mơhno tơ’noăng dêi 63 kong pơlê, pơlê kong kơdrâm ƀă kăn teăng mâ mâu Khu xiâm, tíu cheăng ki tơdjâk. Hneăng tơ’noăng mơgêi râ má pái phôh thong hơnăm kố kô tơkŭm po a mâu hâi lơ 7 ƀă lơ 8/7 la ngiâ.

Tâi tâng hneăng hôp ‘na tơdroăng tơkŭm po tơ’noăng mơgêi râ má pái phôh thong hơnăm 2022

Troh nôkố, Khu xiâm pơkuâ hnê hriâm ƀă hnê mơjiâng tuăn ngôa rơkê hiăng tơbleăng tŭm mâu mơ-éa pơkuâ, hnê mơhno ‘na tơkŭm po hneăng tơ’noăng mơgêi râ má pái phôh thong hơnăm 2022. Xêo troh 17 chôu hâi lơ 5/6, mâu tíu cheăng hiăng pêi kêi đeăng tơdroăng kĭ ăm phĭu kĭ tơ’noăng ƀă tâi tâng kơxô̆ lối 1 rơtuh 2 rơpâu ngế hok tro kĭ tơ’noăng.

Tơbleăng a hneăng hôp, mâu kong pơlê tối ăm ‘nâi, hiăng mơgêi tơdroăng hơnăm hriâm ăm hok tro lâm 12 tiô pơkâ ƀă nôkố dế rak tơkŭm po hriâm mâu  ƀai hriâm ton. Mâu kong pơlê pơrá mơjiâng Khu hnê mơhno tơ’noăng râ kong pơlê, râ tơring vâ tơkŭm po hneăng tơ’noăng châ tơƀrê má môi.

Mâu tơdroăng cheăng hbrâ tơmeăm khoăng, mơngế pêi cheăng a hneăng tơ’noăng dế châ pêi pro, tơniăn tơkŭm po rơtế môi roh tơ’noăng tung lâp tơnêi têa tiô pơkâ hiăng pơkâ mơ’no.

A Sa Ly tơplôu ƀă tơbleăng