VOV4.Xơ Đăng - Rơtế ƀă hok tro lâp tơnêi têa, a Tây Nguyên mâu hok tro veăng tơ’noăng râ má pái phôh thong hơnăm 2022 hiăng troh mâu tíu tơ’noăng pro hlá mơ-éa chêh inâi tơ’noăng kơxê lơ 6/7 ƀă kơxo kố pơxiâm mot tơ’noăng môn ki apoăng, môn Ngữ văn. A kong pơlê Dak lak, ki hên mâu vâi o drêng châ kơ-êng mê vâi tối ăm ‘nâi hiăng loi tơngah hbrâ rơnáu vâ mot tung hneăng tơ’noăng.

Maluâ hên hdroh athế hơ’lêh tơdroăng hriâm troh a lâm chiâng hriâm tiô troăng hyôh Internet mê nếo vêh hriâm a lâm nếo xua tơdjâk dêi pơreăng COVID-19, tơdjâk troh tơdroăng ki chôu pâ mâu ƀai hriâm ƀă hok tro lâm 12, la ƀă tơdroăng mơ-eăm dêi tơná ƀă tơdroăng tơmâng dêi mâu thái cô tung pơla kố nah. Ki hên, mâu vâi o hok tro ăm ‘nâi tơná hiăng hbrâ rơnáu mâu ƀai tơ’noăng, hiâm mơno lĕm hbrâ rơnáu vâ tơ’noăng rôh kố. Hneăng tơ’noăng râ má pái phôh thong hơnăm kố, kong pơlê Dak Lak ai lối 20.400 ngế chêh inâi tơ’noăng a 32 tíu tơ’noăng.

*** Hneăng tơ’noăng mơgêi hriâm râ má pái phôh thong hơnăm kố, kong pơlê Lâm Đồng ai lối 14 rơpâu ngế hok tro chêh inâi tơ’noăng. Vâ tơniăn ăm hneăng tơ’noăng tro tiô pơkâ, kong pơlê hiăng hbrâ mơhno 38 tíu tơ’noăng ƀă ai 629 to veăng tơ’noăng, tung mê ai 6 to veăng ki ăm tơ’noăng tơchoâm a mâu tơring, pơlê kong kơdrâm tung kong pơlê. Pakĭng mơdêk hbrâ mơdât pơreăng, kơpuih văng mơgrúa lĕm veăng tơ’noăng, pêi krúa kế kâ, kring tơniăn mâu tíu tơ’noăng, rak tơniăn troăng prôk ăm mâu hok tro ki tơ’noăng, kong pơlê Lâm Đồng hnê mơhno mâu kăn mâu cheăm tơring tung kong pơlê tŏng kum teăm tơdrêng ăm mâu hok tro lơtiê xơpá ‘na kơxô̆ liăn kâ ối ƀă prôk vêh.

Kăn hnê ngăn kong pơlê Lâm Đồng séa ngăn tơdroăng cheăng hbrâ hneăng tơ’noăng mơgêi hriâm râ má pái phôh thong hơnăm 2022 tung kong pơlê

Tiô djâ Trần Thị Vũ Loan, Kăn phŏ hnê ngăn Vi ƀan pơlê kong kơdrâm Đà Lạt, pakĭng tơdroăng ki tro má môi ăm mâu hok tro, hneăng tơ’noăng po tung pơla Đà Lạt ai krâm tơmối ôm hyô hyoh lăm ngăn, pơtê mê tơdroăng ki xiâm thế rak tơniăn ‘na troăng prôk vêh ăm mâu hok tro mê ahdrối.

*** Sap ing kơxo lơ 6/7, Khu pơkuâ ngăn Đoàn Droh rơtăm kong pơlê Gia Lai tơkŭm lo lăm pêi tơdroăng “Tiâ mơnhên – Tŏng kum tung pơla tơ’noăng” hơnăm 2022. Vâ kum hok tro ƀă nôu pâ, nhŏng o vâi tung hneăng tơ’noăng râ má pái phôh thong hơnăm 2022, Khu hnê mơhno tơdroăng “Tiâ mơnhên – Tŏng kum a rơnó tơ’noăng” kong pơlê Gai Lai hiăng mơjiâng 39 khu droh rơtăm ki pleăng dêi hnoăng cheăng ƀă 292 ngế pleăng dêi hnoăng.

.

Mâu Đoân droh rơtăm dêi kong pơlê Gia Lai hiăng ai mâ a mâu tíu tơ’noăng vâ tiâ mơnhên, tŏng kum ăm hneăng tơ’noăng râ má pái phôh thong Tơnêi têa

Mâu ngế ki veăng ƀă hnoăng cheăng: tơbleăng ăm tíu ối tê kơtê, tíu ối yă rơpâ, tíu ôu kâ yă rơpâ, rak tơniăn krúa kế kâ ăm hok tro ƀă nôu, pâ nhŏng o hok tro; kum chiân, tơdah xo hok tro a mâu tíu tơ’noăng; kum hok tro ki ai tơdroăng rêh ối xơpá; xoăng ăm kên pâng môh rơkong, têa ôu tê kơtê ăm hok tro.

Klêi kơ’nâi leh lo lăm pêi cheăng, mâu ngế ki pleăng dêi hnoăng cheăng hiăng rĕng ai mâ a mâu tíu tơ’noăng vâ veăng “Tiâ mơnhên – kum a rôh tơ’noăng” ăm hok tro.

Gương prế Katarina Nga tơplôu ƀă tơbleăng