Tung mê, 251 toăng hngêi hiăng pro klêi, veăng ‘mâi mơnhông tơdroăng rêh ối dêi kuăn pơlê ki kơtiê xơpá. Tung kơxô̆ 2.092 toăng hngêi hiăng tơbleăng pro a kong pơlê Gia Lai, ai 122 toăng hngêi ăm mâu rơpŏng kơtiê ki ai hnoăng tơnêi têa, rơpŏng ai hnoăng tơnêi têa; ƀă vâ chê 2.000 toăng hngêi ăm mâu rơpŏng kơtiê xơpá.

Ƀă tơdroăng pơkâ mơjiâng pro 8.400 toăng hngêi ăm mâu rơpŏng ối tung tơdroăng hdrối rơnó mêi hơnăm kố, Gia Lai hiăng mơhnhôk tăng hên liăn ing khu râ veăng tơlo. Tung mê, môi khu mơdró hiăng tơbleăng kum ing liăn ‘măn kơdĭng “Xua mơngế xơpá’’ kong pơlê, gum 10 rơtal liăn; Khu xiâm kŏng an hiăng kum lối 201 rơtal liăn ƀă Vi ƀan kong pơlê Gia Lai hiăng xoăng 211 rơtal liăn. Ƀă thâ pêi pro ƀă tơdjuôm ivá dêi rêm râ, kơvâ cheăng tâi tâng pơlê pla, tơdroăng xut tah hngêi pơtân, hngêi xhi kơchoh a kong pơlê Gia Lai dế tơbleăng pêi kơtăng, vâ ‘mâi mơnhông tơdroăng rêh ối dêi kuăn pơlê, malối cho mâu rơpŏng kơtiê, vâ chê kơtiê ƀă rơpŏng ai hnoăng tơnêi têa hdrối rơnó mêi têa lân lu hơnăm kố.

-Riân troh tâi măng tĭng hdrối kong pơlê Kon Tum hiăng xut tah châ 1.016 toăng hngêi pơtân, hngêi xi kơchoh tung tâi tâng kơxô̆ 2.752 toăng hngêi châ mơjiâng nếo ƀă rơnêu. Tung kơxô̆ 1.016 toăng hngêi pơtân, hngêi xi kơchoh hiăng châ kong pơlê Kon Tum gum mâu rơpŏng ‘nhê tah hngêi ton pro ăm hngêi nếo, ai 787 toăng hngêi mơjiâng pro nếo ƀă rơnêu 229 toăng hngêi.

Tơdroăng ‘nhê tah hngêi pơtân, hngêi xi kơchoh a kong pơlê Kon Tum ăm hlo tơdroăng ki veăng dêi mâu khu, rêm râ. Vâ pơtối mơdêk rĕng tơdroăng ‘nhê tah hngêi pơtân, hngêi xi kơchoh pro ăm hngêi nếo, khu râ kăn pơkuâ 10 tơring, pơlê kong kơdrâm dêi kong pơlê Kon Tum dế pêi pro hên troăng tơkŭm tah lôi pá puât, tơvâ tơvân ƀă kơxô̆ liăn râ kơpêng ăm hrá; kơxô̆ liăn vâ ‘nhê tah hngêi pơtân, hngêi xi kơchoh pro ăm hngêi nếo; rơpŏng ôh tá ai kơxô̆ liăn xo hdrối, ôh tá ai kŏng nhân veăng mơjiâng, rơnêu hngêi.