Hngêi nâ Y Chon, kuăn ngo Jêh - Triêng, Kăn hnê ngăn Khu ngăn vâi kơdrâi cheăm Đăk Dục, tơring Ngọc Hồi ối a pơlê Đăk Răng nôkố hiăng chiâng tíu ki tơbleăng, tê mâu tơmeăm pê lo ing chiâk deăng ki vâi ô eăng dêi a cheăm, mê cho tê: hơ’nêh chu ki pheăng, drôu xiâm, po, tiu kong... Kố xuân cho hnoăng cheăng pêi 4 hơnăm mơjiâng khu pêi cheăng tơrŭm cheăm Dục Nông dêi nâ Y Chon.

4 hơnăm mơjiâng khu pêi cheăng tơrŭm tung mê ai 2 hơnăm tro pơtê xua pơreăng COVID-19, la nâ Y Chon  rơtế ƀă vâ chê 40 ngế  tung cheăm xuân ối rak pêi 10 tơmeăm khoăng ‘ngré, tê hên ngế vâ rôe. Kơxô̆ liăn châ xo ing tê tơmeăm hơnăm kố châ 1 rơtal liăn.

Nâ Y chon ăm ‘nâi:

“Đảng viên cho ngế djâ troăng lĕm a hdrối tung tâi tâng mâu tơdroăng mơhnhôk cheăng ki kố ki mê, mâu hnoăng cheăng ki pơcháu. Ngin ôh tá xê tê to chu pŭm ối drêh, hơ’nêh chu nếo klêi xâ chiê lơ hdrê chu vâ păn mê ngin ối pro hơ’nêh chu mê chiâng mâu kơchâi pheăng a on ƀă ngin hiăng rah xo tơmeăm mê vâ tơ’noăng tơmeăm tê OCOP râ kong pơlê ƀă châ 3 hơlŏng.

Troh nôkố tơmeăm ngin tê châ hên mâu ngế, mâu kơchơ vâ rôe, malối cho a rôh Têt tơmeăm ngin tê ôh tá bê ai vâ kơchơ mơdró vâ rôe”.

Tơdroăng dêi nâ Y Chon  hlối pro kăn hnê ngăn Khu vâi kơdrâi cheăm, hlối cho ngế ki hnê chông djâ kuăn pơlê kơpong kơtiê xơpá tăng troăng prôk ki nếo tung cheăng kâ pêi pro tơmeăm hlối tê mơdró, cho môi tung hrĭng rơpâu tơdroăng vâ pơto pơtih ‘na kăn ƀô̆, đảng viên a Kon Tum, djâ troăng a hdrối tung pêi mâu tơdroăng cheăng ki khu tơrŭm cheăng Đảng hiăng pơcháu.   

Tiô pôa A Blum, môi ngế kro mơdrŏng ‘na sâm Ngọc Linh a pơlê Ngọc La, cheăm Măng Ri, tơring Tu Mrông, kơtăn kố lối chât hơnăm mê pôa ƀă kuăn pơlê tung pơlê, xuân kơtiê ‘nâng. Kơnôm kăn ƀô̆ ing hơngế troh a mâu tơring mơ-eăm hnê rơkong tơpui hnê mơhno kŏng hlối pêi a mâu chiâk deăng, hnê mơhno mơdâ kloăng sâm, mơdâ tâ tung kí lía kơphế, hnê tơkâng vâ ăm ai tơkăng ki ai hveăng lĕm... mê nô kố tơdroăng cheăng pêi hiăng pơ’lêh nhên.

Mâu túa pro kro mơdrŏng ƀă kơphế a tơnêi hngíu, pơkeăng tơnêi têa sâm Ngọc Linh hiăng châ pơ-eăng troh lâp tơring Tu Mrông.

Pôa A Blum rơrêk lo têa mâ tối:

 “Kuăn pơlê pin tiô Đảng, Tơnêi têa, tơmâng kăn ƀô̆ hnê túa pêi cheăng kâ, pêi chiâk eăng, pêt sâm, mơdâ pêt báu vâ ai hmê kâ, ai tơdroăng rêh ối phâi tơtô, hơniâp ro”.

Tiô pôa Dương Văn Trang, ngế cheăng tung tíu xiâm Đảng, Kăn hnê ngăn Đảng ủy kong pơlê, Kăn hnê ngăn Hô̆i đong kong pơlê Kon Tum, tung mâu hơnăm hdrối ‘na tíu pêi cheăng tơmeăm khoăng ƀă kơpong hdroâng kuăn ngo malối kơtiê xơpá, hiăng ai chât rơpâu ngế kăn ƀô̆ đảng viên châ mơhnhôk lăm troh a cheăm ‘’pro nhŏng o’’ ối a thôn, pơlê ‘’rơtế kâ ối, rơtế pêi ƀă’’, tơmâng kuăn pơlê tối, tơleăng mơnhên tơdroăng kuăn pơlê pâ thế ƀă tơdroăng púi vâ dêi kuăn pơlê.

Lăm troh a pơlê cheăm, hlối rơtế ƀă pơlê, cheăm tơmâng tŏng kum ‘na mơnhông cheăng kâ – rêh ối, mơnhông tơdroăng rêh ối dêi kuăn pơlê cho pro xiâm, châ pêi pro plâ tung mâu hơnăm hdrối nah dêi mâu ngế ki pro kăn pơkuâ kong pơlê Kon Tum. Ƀă tung hơnăm 2020-2025 hnoăng cheăng mê châ mơdêk luât pơkâ pro tơ’lêi tung mơhnhôk krá tơniăn ton ăm mâu thôn pơlê.

“Hiăng cho kăn ƀô̆ đảng viên veăng kum mâu kơtiê xơpá, vâ chê kơtiê hdroâng kuăn ngo lăm troh a chiâk klâng, kơdrum hlối hnê kuăn pơlê “chôa hnê i iâ ah kuăn pơlê kô pâ”, rơkong tơpui hnê kŏng hlối pêi’’ hnê kuăn pơlê hdroâng kuăn ngo thế ai tuăn mơ-eăm kơhnâ tung pêi cheăng vâ hluăn kơtiê. Kố cho môi tung mâu tơdroăng cheăng ki kal dêi rêm ngế kăn ƀô̆ đảng viên a pơlê cheăm tíu ai krâm mâu kuăn ngo rêh ối’’.

Ing tơdroăng rơtế vâ môi tuăn dêi Đảng ƀă kuăn pơlê, kong pơlê Kon Tum hiăng rĕng pê klêi mâu pơkâ tâi tâng mâu cheăm ai troăng ô tô prôk troh a cheăm; tơdroăng hnê hriâm châ mơnhông; hngêi pơkeăng cheăm hiăng ai ƀok thái pơkeăng. Kơxô̆ rơpŏng kơtiê sap 64% a rôh mơjiâng kong pơlê hơnăm 1991 nah, hiăng chu ối 11% a mơ’nui hơnăm 2022.

Tơdrêng amê cho mơjiâng tơdroăng kal kí krá rơdêi ƀă 14 Đảng ƀô̆ dêi râ kong pơlê, 668 khu tơrŭm cheăng Đảng a cheăm ƀă lối 31 rơpâu 300 ngế đảng viên. Môi tuăn ƀă troăng rơhlâ ƀă tơdroăng cheăng pêi, Đảng ƀô̆ kong pơlê Kon Tum pơtối ‘mâi mơnhông tuăn loi Đảng dêi mâu  kuăn pơlê tung kong pơlê.

Tơdrêng amê, tuăn loi krá xuân cho ki xiâm ƀă mơnhông khên tơnôu ăm tâi tâng mâu Đảng ƀô̆, pêi hnoăng cheăng ki kân, pơtối rak ki rơdêi dêi kong pơlê vâ mơnhông krá tơniăn ton.