Ƀă 135 rơpŏng kuăn pơlê, hdroâng kuăn ngo Jêh -Triêng a thôn Dục Nhầy 1, cheăm tơkăng kong Đăk Dục, tơring Ngọc Hồi, kong pơlê Kon Tum, mâu kăn ƀô̆, mâu mố đô̆i gak tơkăng kong Dục Nông ngăn dêi pó môi tiah nhŏng o tung môi rơpŏng hngêi. Tâi tâng mâu kuăn pơlê tung thôn xuân hơ-ui pâ dêi rơpó, tơpui lĕm ƀă dêi rơpó rêm rôh tơbâ troh kăn ƀô̆, mối đô̆i gak tơkăng kong. Ngoh A Luật, môi ngế kuăn pơlê tung thôn ai tối tiah kố.

“Đông tơkăng kong tơmâng khât troh mâu rơpŏng hngêi, rơpŏng ki xơpá. Veăng gum klêi mê xo păn roăng mâu vâi hdrêng ki ôh tá ai nôu pâ păn roăng. Đi đo tơmâng ngăn troh kuăn pơlê tung cheăm Đăk Dục. A hlo mâu lêng mố đô̆i tơkăng kong a kố hmâ,  achê, ôh tá pơrah, ‘nâi tơrŭm, hlối hmâ’’.

Nâ Xiêng Thị Túy, Kăn hnê ngăn Chi ƀô̆, Kăn thôn Dục Nhầy 1,  ăm ‘nâi 3 hơnăm hdrối Khu pơkuâ Đông tơkăng kong Dục Nông rah xo Thiê̆u tă Dương Văn Lương lăm troh a Chi ƀô̆ thôn. Pơtối rak vế hnoăng cheăng dêi ngế lêng gak tơkăng kong, thiê̆u tăng Dương Văn Lương hiăng tăng ‘nâi plĕng ăm Chi ƀô̆ tối mâu tơdroăng Pơkâ vâ pơ’lêh tung tơdroăng mơjiâng Đảng ƀă mơnhông tơdroăng rêh ối dêi kuăn pơlê. Chi ƀô̆ thôn Dục Nhầy 1 tơ’mot 2 ngế đảng viên nếo pro kơxô̆ đảng viên tung Chi ƀô̆ tâk 19 ngế, kơdroh kơxô̆ rơpŏng kơtiê tung lâp thôn chu ối 6 rơpŏng:

“Vâi pú kơhnâ veăng pêi hên tơdroăng cheăng veăng tơpui tối mâu tơdroăng tung mơnhông dêi Chi ƀô̆, gum Chi ƀô̆ mơjiâng tơdroăng pơkâ klêi mê Pơkâ dêi Chi ƀô̆ ƀă tơdroăng kal pêi pro rêm rôh hôp ai hên tơdroăng veăng tơpui tâ, tơ’mot hên đảng viên. Pakĭng mâu tơdroăng cheăng ki mê mâu vâi pú ối kơhnâ veăng gum kuăn pơlê. Sap ing mê, ai mâu lêng kuăn pơlê veăng pêi cheăng a chi ƀô̆ mê thôn xuân pêi cheăng tơƀrê krúa lĕm rơdêi, klêi mê ôh tá ai rơpŏng ki lâi pro xôi luât’’.

Vâ tơrŭm krá tâ pơla mâu lêng ƀă kuăn pơlê, mơjiâng ‘’ăm kuăn pơlê hmiân tuăn’’ chân krá, sap ing hơnăm 2020 troh nôkố Khu pơkuâ ngăn lêng Tơkăng kong Kon Tum hiăng ăm mâu kăn lêng, mâu lêng kuăn pơlê ki kơhnâ rơkê a mâu Đông tơkăng kong lăm troh a tâi tâng 13 to cheăm tơkăng kong; 17 ngế kăn ƀô̆ mot tung Hô̆i đong kuăn pơlê rêm kong pơlê, tơring, cheăm…

Trung tă A Ngọc Chiến, Đông Tơkăng kong Đăk Nhoong châ Khu xiâm pơkuâ ngăn Mố đô̆i Tơkăng kong dêi kong pơlê Kon Tum rah lăm pêi cheăng, xo pêi hnoăng cheăng pro Kăn phŏ pơkuâ hnê ngăn Đảng ủy, Ngế pơkuâ Vi ƀan séa ngăn cheăm tơkăng kong Đăk Nhoong, tơring Đăk Glei ăm ‘nâi:

“A hiăng tí tăng ‘nâi plĕng ăm Đảng ủy tơbleăng Pơkâ kăn hnê mơhno ƀă tơdroăng hnê thế dêi Vi ƀan kuăn pơlê, Măt trâ̆n Tơnêi têa ƀă mâu khu tơrŭm cheăng kal kí pơlê pơla môi tuăn veăng tơmâng tối mâu túa mơnhông cheăng kâ, malối cho tơdroăng xut tah túa tơlá ton nah ki ôh pá tro vâ kuăn pơlê hdroâng kuăn ngo mơ-eăm hluăn kơtiê krá ton. Ngin ‘nâi nhên pêt loăng pơkeăng má môi cho sâm Ngọc Linh, ma péa ngin kô tơbleăng pêt kơxêt pâng ling vâ pro xiâm ki mơnhông ai pơxúa hên tung cheăng kâ”.

Ƀă tơdroăng ‘’Đông cho hngêi, Tơkăng kong cho pơlê xiâm, kuăn pơlê mâu hdroâng mơngế, mâu kuăn ngo ngăn dêi rơpó môi tiah nhong o môi klêa kliâm”, mâu mố đô̆i gak tơkăng kong dêi kong pơlê Kon Tum hiăng ai hên tơdroăng cheăng pêi pơxúa  khât, mê cho tơrŭm krá pơla mâu lêng ƀă kuăn pơlê a tíu tơkăng kong. Ki hlo hên cho túa “Mơjiâng thôn Đăk Ga, cheăm Đăk Nhoong, tơring Đăk Glei phâi tơtô, krá rơdêi, tơniăn’’; mâu tơmeăm khoăng ki pơxúa ăm kuăn pơlê, mê cho: Hngêi kơmăi on tơhrik kŭn Đăk Giao – Đăk Long; kleăng têa kơneăng Bờ Y, Đăk Long, Đăk Blô; túa pơkuâ cheăng, pro nhŏng o ƀă rơpŏng hngêi kơtiê xơpá gum kuăn pơlê hluăn kơtiê; gum 74 ngế vâi hdrêng tiô tơdroăng “Mơdêk hvêa chêng o troh hngêi trung’’; 15 ngế kuăn roăng rak dêi Đông tơkăng kong… Ing tơdroăng rơtế ƀă, veăng gum dêi mâu kăn ƀô̆, mâu lêng mố đô̆i gak tơkăng kong, tơdroăng rêh ối dêi kuăn pơlê tung kơpong tơkăng kong dêi kong pơlê Kon Tum rế hía rế xông tơƀrê, ‘’ mơhno ki hmiân tuăn kuăn pơlê, thăm tơ ‘nôm tơrŭm krá khât.