Pôa Rơ Chăm Tích  krâ pơlê, mơngế Jarai ối a pơlê Mook Đen 2, cheăm Ia Dom, tơring Đức Cơ, kong pơlê Gia Lai cho môi tung mâu ngế đảng viên kơhnâ rơkê tung tơdroăng tơrŭm  ƀă mâu râ ủy Đảng, mâu kăn ƀă mâu tíu pêi heăng vâ hnê, mơhnhôk kuăn pơlê kring gak troăng tơkăng kong, tâp tơniăn hdró. Hên hơnăm kố pôa kơhnâ mơ-eăm lăm pôu tơrêm rơpŏng hnê kuăn pơlê vâ kuăn pơlê hlê, pôi tá kơtâu kĕn kong têa ê; tah lôi tuăn tơmiât ki rơhăm hdi tơnêi pêi chiâk a mâu kơpong tơkăng kong; pơtối rak vế ki môi tuăn dêi rơpó, tah lôi túa tơlá ton nah ki ôh pá tro, tơ’noăng pêi chiâk, pêt kơxu, pêt kơphế vâ mơnhông cheăng kâ tung rơpŏng hngêi vâ dêi rơpŏng hngêi rế xông tơƀrê.

Pôa Rơ Chăm Tích, krâ pơlê ăm ‘nâi: Ia Dom cho cheăm tơkăng kong ki kơtiê xơpá, kuăn pơlê hdroâng kuăn ngo a kố hâi hlê hên ‘na luât. Hlo kuăn pơlê ôh tá hlê plĕng, khu ‘mêi ki hriăn vâ pro tơkâ  ki tơrŭm hiăng pơlông djâ kuăn pơlê kơtâu kĕn kong têa ê hmâng vâ, pro ăm kuăn pơlê chiâng tơhôu, tá vâ tơrŭm môi tuăn dêi rơpó pơla hdroâng mơngế.

Ƀă pôa tối, kring gak troăng tơkăng kong gak tíu tâp tơneăn hdró tơkăng kong, rak hnoăng pơkuâ tơnêi têa cho tơdroăng pêi ai pơxúa ƀă hlối tĭng:

“ ‘Na kring tơniăn a kố tơniăn ‘nâng, ‘na tơdroăng cheăng kring gak tơkăng kong a lăm troh a đông pêi cheăng rơtế ƀă đông lăm séa ngăn, gak ngăn tơneăn tâp hdró a tíu tơkăng kong. Hơnăm ki lâi xuân prôk lăm, vâ hnê ăm kuăn pơlê pôi tá hdi tơnêi ki pá tá; pôi tá lăm pêi chiâk a tơnêi  peăng tơná. Malối hnê mâu rơxông nếo ‘na tơdroăng pôi rĕng xo on veăng, pôa xuân hnê tối hên xua troăng rơhlâ dêi Đảng ƀă Tơnêi têa cho mơdât, ôh tá ăm mâu rơxông nếo xo dêi rơpó drêng tá hâi tro hơnăm’’.

Jâ Lê Thị Khánh Hòa, kăn hnê ngăn Đảng ủy cheăm Ia Dom, tơring Đức Cơ ăm ‘nâi: Tung cheăm ai 4 ngế krâ pơlê. Mâu krâ pơlê đi đo djâ troăng a hdrối tung mâu tơdroăng mơhnhôk pêi a pơlê cheăm, veăng mơnhông cheăng kâ-rêh ối, rak tơniăn kal kí ƀă rak tơniăn pơlê pơla cheăm bêng.

Malối, Ia Dom cho cheăm tơkăng kong mâu krâ pơlê, cho mâu đảng viên ki djâ troăng a hdrối, rêm hâi ƀă mâu kơ koan, khu râ kơvâ cheăng, mố đô̆i gak tơkăng kong hnê, mơhnhôk kuăn pơlê veăng kring gak troăng tơkăng kong, tơneăn tâp hdró, kring vế tíu tơkăng kong tơnêi têa:

“Ƀă cheăm mâu krâ pơlê, kăn pơlê, mơngế ki kuăn pơlê pâ nhoăm a pơlê cheăm pơtối pêi pro tro hnoăng cheăng. Ing hdrông hdrê, rơpŏng hngêi, mơhno troăng ki lĕm tung pêi pro, ôu pơkoăng, mơdâm kiâ, pêi tơdroăng túa lĕm tro, hnê tơdroăng pôi tá rĕng xo on veăng drêng ta hâi tro hơnăm, mơhnhôk vâi o hok tro mơ-eăm hriâm, rôe ƀaoh hiêm khăm pơlât ing mê vâi hmâng klêi mê pêi pro ƀối”.

Môi tiah mê, a tơring tơkăng kong Chư Prông, mâu krâ pơlê, đảng viên xuân pơtối rak vế hnoăng cheăng, ki loi nhoăm dêi tơná, mơhnhôk nhŏng o tung hdrông hdrê, kuăn pơlê veăng mơnhông cheăng kâ-rêh ối, mơjiâng Đảng ƀă khu cheăng kal kí; rak tơniăn pơlê pơla, mơjiâng khâu tơrŭm môi tuăn mâu hdroâng kuăng ngo.

Pôa Rơ Lan H’Lêk, krâ pơlê Klah, cheăm Ia Mơ, tơring Chư Prông ăm ‘nâi:

“Tung cheăm tơkăng kong mê tơdroăng mơhnhôk  kuăn pơlê ƀă tơdroăng hnê tối xuân pá puât la tơná á pêi cheăng kố đi đo vâ tăng ‘nâi plĕng tơdroăng tung pơlê. A kố kuăn pơlê hiăng prôk pro krâ pơlê mê a pơtối mơ-eăm. A ối rêh ối kâi hiâm a pơtối pêi cheăng kum kuăn pơlê ‘nôi vâ kuăn pơlê hlê nhên luât dêi Đảng ƀă Tơnêi têa ƀă kơpong tíu tơkăng kong, kơpong hdroâng kuăn ngo”.

Lâp tung kong pơlê Gia Lai nôkố ai 955 ngế krâ pơlê, mơngế kuăn pơlê pâ nhoăm tung kơpong kuăn ngo, tung mê hên đảng viên.  Tung pơla hơnăm 2021-2023, mâu ngế kuăn pơlê pâ nhuô̆m a Gia Lai hiăng kơhnâ tơrŭm ƀă mâu khu râ kơvâ cheăng a cheăm bêng hnê, mơhnhôk kuăn pơlê veăng ‘no hnoăng, kơjo kum mơhnhôk ‘’Tâi tâng kuăn pơlê tơrŭm môi tuăn mơjiâng thôn pơlê nếo, kơphô̆ rơkê plĕng” ƀă lối 700 rơtal liăn, pleăng lối 132.000 m2 tơnêi ƀă ‘no hnoăng lối 47 hâi cheăng.

Pakĭng mê, mơngế ki kuăn pơlê pâ nhoăm ối kum ăm lối 20.000 rơpŏng kơtiê hdroâng kuăn ngo pơ’lêh tơdroăng tơchĕng tơmiât, túa pêi cheăng, pêi chiâk, mơ-eăm pêi cheăng vâ hluăn ing kơtiê, veăng kơdroh kơxô̆ rơpŏng kơtiê tung kong pơlê.

Pôa Hồ Văn Niên, ngế cheăng tung tíu xiâm Đảng, Kăn hnê ngăn Đảng kong pơlê Gia Lai tối: Pơtối rak hnoăng cheăng pêi ƀă kuăn pơlê, mơngế kuăn pơlê pâ nhoăm a Gia Lai hiăng pơtối rak vế pêi tro hnoăng cheăng tơná tung mơhnhôk kuăn pơlê pêi tơdroăng mơnhông cheăng kâ - rêh ối veăng rak tơniăn a pơlê cheăm.

“Hnoăng cheăng dêi ngế kuăn pơlê pâ nhoăm kum tơdroăng rêh ối dêi kuăn pơlê a mâu thôn pơlê xuân môi tiah tơdroăng kring tơniăn,  rak pơlê pơla a mâu thôn pơlê châ rak ngăn khât ƀă pơtối pêi pro. Rak túa lĕm tro vêa vong dêi tơrêm hdroâng kuăn ngo, xua mê mâu râ kăn cheăm tơring ƀă kong pơlê ngin tơmâng khât ƀă hnoăng cheăng pêi dêi krâ pơlê cho ngế kuăn pơlê pâ nhoăm”.