Rơtế ƀă hnoăng cheăng pơkuâ, hnê hriâm, hnê mơjiâng khu ngế lêng hă sih quan pơkuâ, trung câ̆p, cao đẳng, đăi hok kơvâ cheăng lêng, hnê tơdroăng ki rơkê cheăng lêng gâk kring khu ki má 2..., Hngêi trung quân sư̆ Quân khu 1 châ pơcháu hnoăng cheăng tơrŭm ƀă Hok viê̆n Kal kí pơkuâ lâm Hnê mơjiâng tuăn ngôa rơkê iâ hâi ăm kăn ƀô̆ kal kí râ trung, sư đoân, hnê mơjiâng hneăng má 1, sih quan râ phân đô̆i râ đăi hok dêi Hok viê̆n Quân y. Drêng veăng hneăng hriâm, mâu ngế hriâm pơrá mơdêk hlê plĕng, xúa ki châ tơƀrê tung tơdroăng nôkố a tíu cheăng, pơlê tíu pêi cheăng. Đông chĭ Lý Ngọc Minh, Kăn pơkuâ Khu pơkuâ cheăng lêng bêng Vĩnh Trại, pơlê kong kơdrâm Lạng Sơn dế tiô hriâm lâm liên thông cao đẳng to râ đăi hok Kơvâ cheăng lêng, tối ăm ‘nâi:

            ‘’Drêng hriâm châ ‘nâi tơdroăng rơkê nếo dêi mâu thái mê á hlo ai pơxúa kân, hbrâ ăm kăn ƀô̆ troăng pêi cheăng khoa hok. ‘Na rak troăng tơmiêt xúa tung tơdroăng cheăng châ tơƀrê tâ ahdrối á lăm hriâm’’.

            Vâ mơdêk châ tơƀrê tơdroăng hnê hriâm, Khu pơkuâ Hngêi trung Quân sư̆ Quân khu 1 hiăng mơhnhôk hên tơdroăng tơ’noăng ‘’Rŭm môi tuăn, djâ troăng ahdrối, pêi tiô pơkâ, tơmiêt pêi rơkê, khŏm ƀlêi trâng’’,   ‘’Rŭm môi tuăn lĕm, kheăn hôu kơtăng, tơ’noăng mơjiâng hnoăng khŏm ƀlêi trâng’’...Ing mê mơjiâng ivá troh lâp lu, mơhnhôk kăn ƀô̆, thái cô, ngế hriâm rŭm môi tuăn, tơmiêt pêi rơkê, pơhlêh nếo, hên troăng pêi rơkê, troăng tơmiêt kih thuât châ po rơdâ.

A hneăng tơ’noăng kăn ƀô̆ pơkuâ hnê mơhno rơkê, thái cô hnê rơkê hơnăm 2023 hngêi trung ai 57 ngế thái cô châ rơkê râ khoa, 31 ngế kăn ƀô̆ pơkuâ rơkê râ tiêuh đoân, 44 đô̆ng chĭ châ rơkê râ hngêi trung. Tung hơnăm hiăng hluâ, hngêi trung hiăng veăng séa ngăn tơdah 01 đê tai, 02 troăng tơmiêt pêi rơkê kih thuât, 03 mơ-éa hnê tơbleăng râ kơvâ, 01 đê tai, 01 troăng tơmiêt pêi rơkê râ Quân khu; 04 troăng tơmiêt pêi rơkê kih thuât râ hngêi trung ƀă châ Quân khu pơkâ thế kheăn kơdeăn 01 troăng tơmiêt pêi rơkê râ Khu xiâm pơkuâ lêng.

Thiê̆u tă Phạm Tuấn Việt, thái Khoa Binh Chủng, Hngêi trung Quân sư̆ Quân khu 1 ƀă đê tai khoa hok ‘na tơmeăm ki pro chiâng râng tơdrăng mơgán ăm phao, tối:

            ‘’Đê tai kố kô pro tơniăn tâi tâng tơdroăng ki tá hâi tro. Drêng tá hâi ai kơmăi pro chiâng râng tơdrăng mơgán mô đô̆i thế xúa ‘nêk kơƀên vâ chiâng chêng vâ râng tơdrăng mơgán. Drêng trâm tíu tơnêi rơpâ cho xuân pá puât, chôu phut xo râng tơdrăng mơgán ton 2 phut. Drêng xúa đê tai mê bu tâi sap ing 10 – 15 yâi’’.

            Vâ xúa tơdroăng hnê hriâm ‘na tơdroăng cheăng Đảng, kal kí tơdroăng nếo, Hngêi trung Quân sư̆ Quân khu 1 hiăng mơjiâng mâu mơ-éa yăo án, mơ-éa yăo trinh tiô mâu mơ-éa hnê mơhno, pêi pro tơdroăng pơtâp tơxâng tiô pơkâ nếo. Đăi tă Dương Xuân Thủy, Kăn pơkuâ Khoa Khóa hok xah hô̆i ƀă Nhân văn, Hngêi trung Quân sư̆ Quân khu 1, tối ăm ‘nâi:

            ‘’Hngêi trung hnê mơjiâng tơdroăng pêi cheăng Đảng tơdroăng cheăng kal kí ƀă hlối hnê mơjiâng pêi pro tơdroăng nôkố, kố cho mâu môn ki mơngế hriâm la ngiâ kô thế pêi, hbrâ nhên tơdroăng ăm vâi. Khu môn kố klêi hriâm tiô tơdroăng cheăng dêi vâi la ngiâ vâi kô xúa pêi hlối. Pơtih drêng pêi hnoăng cheăng kal kí, kăn pơkuâ hnê ngăn chi ƀô̆ thôn, kăn pơkuâ hnê ngăn cheăng đoân ngin hbrâ xúa tung tơdroăng cheăng, tơdroăng ki rơkê nôkố vâi thế pêi, môi tiah troăng tơkŭm po môi roh hôp chi ƀô̆, tơkŭm po hôp đoân droh rơtăm, lơ xúa mâu tơdroăng pêi ‘na pơtâng tối mê ngin pơrá tơbleăng ăm pêi pro tơdroăng nốkố ƀă vâi, vâ vâi pêi’’.

            Pêi pro Pơkâ kơxô̆ 1657 dêi Khu pơkuâ hnê ngăn cheăng Đảng tơnêi têa, Pơkâ kơxô̆ 20 dêi Đảng ŭy Quân khu ‘na pơhlêh nếo tơdroăng hnê hriâm ƀă hnê mơjiâng tuăn ngôa rơkê tơxâng pơkâ hnoăng cheăng mơjiâng khu lêng tung tơdroăng nôkố nếo ƀă mơdêk tơdroăng hnê pơtâp, Hngêi trung Quân sư̆ Quân khu 1 hiăng pêi pro hên troăng hơlâ troăng pêi mơdêk vâ kêi đeăng hnoăng cheăng châ pơcháu ƀă troăng pêi mơjiâng hngêi trung  ó rơdêi tâi tâng ‘’Prôk hdrối, kơhnâ rơkê’’ kum tung tơdroăng mơjiâng ƀă gâk kring tơnêi têa Việt Nam xah hô̆i chưh nghiah tung rơxông nếo. Đăi tă Đào Văn Minh, Kăn phŏ pơkuâ Hngêi trung Quân sư̆ Quân khu 1, tối ăm ‘nâi:

            ‘’Tung tơdroăng hnê mơjiâng ôh tá xê to ‘na tơdroăng ki rơkê mê ối ai tá troăng pêi cheăng dêi kuăn mơngế. Rêm hơnăm ngin lăm séa ngăn ki dâi lĕm mâu ngế hriâm drêng lo hngêi trung, ngế hriâm tiêuh đô̆i trưởng 3 – 5 khế lo hngêi trung mê troăng pêi cheăng cho lĕm tro tâ mâu ngế ki ôh tá châ hriâm. Sih quan ki hbrâ ing mâu kơ koan yân chính Đảng klêi kơ’nâi châ hriâm a hngêi trung ‘na tơdroăng pêi cheăng pakong ing râ tơring tơngi klêng mê ai troăng pêi cheăng phá tơ-ê hlối’’.

            Tung tơdroăng tơ’noăng koh phiu ro hâi leh tơbâ hơnăm hâi mơjiâng khu lêng Quân khu 1, leh tơbâ, 80 hơnăm Hâi mơjiâng Khu lêng kuăn pơlê Việt nam mơnhông tơdroăng ki châ tơƀrê, Đảng ŭy, Khu pơkuâ Hngêi trung Quân sư̆ Quân khu 1 pơtối mơdêk mâu tơdroăng tơ’noăng mơdêk châ tơƀrê tơdroăng hnê hriâm hnê mơjiâng, mơnhông khôi túa pâ nhuô̆m tơnêi têa, khŏm mơ-eăm xêh, mơ-eăm khât, pói vâ pleăng hnoăng cheăng, kêi đeăng hnoăng cheăng châ pơcháu./.