Khu mô đô̆i hneăng hdrối kong pơlê Dak Lak nôkố ai lối 50.700 ngế, veăng tơkŭm pêi cheăng a 261 khu tơrŭm cheăng. Tung 20 hơnăm pêi pro Pơkâ kơxô̆ 09 hơnăm 2002 dêi Khu xiâm kal kí, mâu mô đô̆i hneăng hdrối nah Dak Lak đi đo mơdêk hiâm mơno, tơdroăng ki khên tơnôu "mô đô̆i Pôa Hồ" tung mơjiâng gak kring Đảng, khu râ kăn pơkuâ, thăm veăng tơpui tối tung tơdroăng hbrâ mơdât kâ kơhveăm liăn ngân.

Tơdroăng mô đô̆i hneăng hdrối djâ troăng ahdrối rak đi đo ƀă mơnhông lâp lu, ing mê châ hlo ƀă po rơdâ mâu mô đô̆i hneăng hdrối nah djâ troăng ahdrối ki kơhnâ, rơkê.

Khu mô đô̆i hneăng hdrối nah kong pơlê Dak Lak hiăng mơhnhôk vâ chê 138 rơtal liăn vâ xut tah lôi hngêi xiê kơchoh, tŏng kum hdrê mơnăn păn, pro phĭu kơdĭng liăn, tŏng kum khu mơ-eăm tơkâ hluâ mâu tơdroăng pá puât. Xông tơpui a hneăng hôp, pôa Y Ƀiêr Niê, Kăn phŏ pơkuâ hnê ngăn cheăng Đảng kong pơlê Dak Lak tối, tung la ngiâ, mô đô̆i hneăng hdrối tung kong pơlê kal pơtối mơnhông hnoăng ƀă khôi túa lĕm dêi "Mô đô̆i Pôa Hồ", hnê hriâm tiô khôi vâi krâ nah, troăng tơmiât pơ'lêh ăm rơxông nếo.