Hneăng po kơchơ kố ai 380 tíu mơđah tơbleăng, ai tá tơdroăng veăng kum dêi 180 khu mơdró veăng tê, mơđah tơmeăm, tung mê, ai mâu kăn teăng mâ dêi 30 kong pơlê, pơlê kong kân tung lâp tơnêi têa. Hneăng po kơchơ kố, mơhno tơbleăng mâu tơmeăm ki châ dó inâi OCOP, tơmeăm ‘na thôn pơlê mơjiâng pro, mâu tơmeăm ki dâi lĕm dêi mâu kong pơlê, pơlê kong kân vâ xúa tung pêi chiâk pêi deăng, mơ’no tê mơdró.

Hneăng po kơchơ kố xuân vâ mơhno tối mâu tơdroăng ki rơkê tung pêi cheăng kâ - túa lĕm tro, pơlê pơla, mâu túa cheăng ki rơkê, troăng hơlâ ki kơjo kum dêi mâu kong pơlê tung kơpong. Ing mê, thăm mơdêk tơdroăng ki tơrŭm mơnhông pêi cheăng kâ - rêh ối pơlê pơla mâu kong pơlê ƀă tung kơpong tung lâp tơnêi têa; kum ăm khu mơdró kâ, mâu khu ki veăng mơ’no liăn tung kơpong tơrŭm, tê mơdró, cheăng kâ vâ rế hía tơdroăng mơdró kâ thăm rế châ tơtêk, pêi lo liăn ngân thăm rế hên.